Respublika Çağırış Komissiyasının sədri dəyişdirildi

General-leytenant Əlağa Hüseynovu müavini polkovnik Ramiz Məmmədov əvəz edib

Azərbaycan Nazirlər Kabineti «Vətəndaşların 2009-cu ilin aprelin 1-dən 30-dək həqiqi hərbi xidmətə çağırılmasının təmin edilməsi tədbirləri haqqında» qərar qəbul edib.

Bu barədə APA-ya Nazirlər Kabinetindən məlumat verilib. Baş nazirin birinci müavini Yaqub Eyyubovun imzaladığı qərarla hərbi xidmətə çağırışı üzrə Respublika Çağırış Komissiyasının tərkibi təsdiqlənib. Ötən çağırış mövsümündə Respublika Çağırış Komissiyasının sədri olmuş Respublika Hərbi Komissarı, general-leytenant Əlağa Hüseynovu bu vəzifədə onun müavini polkovnik Ramiz Məmmədov əvəz edib. Dövlət Sərhəd Xidməti İnspektorluğunun rəisi Ehram Hacıyev isə Komissiyanın sədr müavini təyin olunub.

Qərarla Respublika Çağırış Komissiyası və Naxçıvan Muxtar Respublikasının Çağırış Komissiyasına vətəndaşların Silahlı Qüvvələrə və qanunvericilikdə nəzərdə tutulmuş digər silahlı birləşmələrinə həqiqi hərbi xidmətə çağırışını qanunvericiliyin tələblərinə uyğun olaraq həyata keçirilmək həvalə olunub.

Qərarın dördüncü bəndi məxfi olduğundan açıqlanmayıb. Qərara əsasən, Müdafiə, Səhiyyə, Daxili İşlər, Nəqliyyat, Maliyyə nazirlikləri və yerli icra hakimiyyəti orqanları vətəndaşların aprelin 1-dən 30-dək həqiqi hərbi xidmətə çağırılmasının təmin edilməsi üçün qanunvericilikdə nəzərdə tutulmuş aidiyyəti tədbirlər görməlidir.

Qeyd edək ki, Nazirlər Kabineti hər çağırış mövsümü üçün Respublika Çağırış Komissiyasının sədri və üzvlərini təyin edir.