Almatıda itkin düşən azərbaycanlı uşağın meyiti tapılıb

7 yaşlı Aysel Namiq qızı Rəsulova aprelin 19-da itkin düşüb

Almatıda aprelin 19-da itkin düşən 7 yaşlı azərbaycanlı Aysel Namiq qızı Rəsulovanın meyiti tapılıb.

Almatı Daxili İşlər Departamentinin mətbuat xidmətindən APA-nın Qazaxıstan müxbirinə verilən məlumata görə, aprelin 19-da Aysel Rəsulova bir neçə uşaqla birlikdə Rıskulova və Brodcki küçələrinin kəsişdiyi yerdə yerləşən qəbiristanlığa gedərək Pasxa bayramı payı yığmaq istəyiblər. Həmyaşıdlarından az pay yığan Aysel daha iki qəbiristanlığa gedib və azaraq yoldaşlarını itirib. Aysellə birlikdə qəbiristanlığa gedən uşaqlar bu barədə milisə məlumat veriblər. Aprelin 28-də qəbiristanlığa qohumlarının məzarını ziyarətə gələn qadın qırılmış ağac budaqlarının altında ölmüş qız meyiti aşkarlayıb. Hazırda meyitin ilkin müayinəsi keçirilir. Onun hər hansı təzyiqə məruz qalıb-qalmadığı barədə ekspertiza rəyi sonra açıqlanacaq.

Qeyd edək ki, Aysel Rəsulovanın ailəsi Almatı şəhərinə Gürcüstandan köçüb.