Kürdəmirdə Şəhidlər Xiyabanı yanıb

Rayonda bir gündə 12 yanğın hadisəsi baş verib

İyulun 17-də Kürdəmir şəhərində və rayonun Muradxanlı, Atakişili, Dəyirmanlı, Mollakənd və Xırdapay kəndlərində ümumilikdə 12 yanğın hadisəsi baş verib.

APA-nın yerli bürosunun məlumatına görə, yanğınlar nəticəsində 2 tövlə və 2000 ədəd ot bağı, 1 ikiotaqlı ev, bir şirə istehsalı sexi, 3 həyətyanı sahənin mühafizə çəpəri və meyvə bağı, 3 ərazidə isə ümumilikdə 250 hektardan artıq biçilmiş taxıl sahəsi və otlaq yanıb.

Bundan başqa, Kürdəmir şəhərindəki Şəhidlər Xiyabanının və Xırdapay kəndindəki qəbiristanlığın bir hissəsi yanıb. Xırdapay kəndindəki yüksək gərginlikli elektrik dirəyində baş verən yanğın nəticəsində əhalinin elektrik enerjisindən istifadəsində bir neçə saat məhdudiyyət yaranıb. Fövqəladə Hallar Nazirliyinin Kürdəmir Dövlət Yanğından Mühafizə Hissəsinin işçiləri bütün hadisələrin qarşısının vaxtında alınmasına nail olublar. Hissədən bildiriblər ki, bir gündə Kürdəmirdə bu qədər sayda yanğın hadisəsinin baş verməsi ilk dəfə müşahidə olunur. Rayonda havanın həddən artıq isti və küləkli olması yanğın hadisələrin baş verməsinə əsas səbəb kimi göstərilir.
bu xəbər 5 dəfə oxunub