İrandan Azərbaycana külli miqdarda narkotik gətirilməsinin qarşısı alınıb

Lent.az-ın Dövlət Gömrük Komitəsinin rəsmi saytına istinadən verdiyi məlumata görə, Biləsuvar Gömrük İdarəsinin Gömrük hüquqpozmalarına qarşı mübarizə şöbəsindən daxil olmuş məlumat əsasında Biləsuvar Gömrük Sərhəd Buraxılış Məntəqəsində İran İslam Respublikasından Azərbaycan Respublikasına piyada gələn AR vətəndaşı Əliyev Ənvər Əlibala oğlu saxlanılmış və onun üzərində şəxsi yoxlama aparılıb.

Şəxsi yoxlama zamanı Əliyev Ənvər Əlibala oğlunun düz bağırsağından, gömrük nəzarətindən gizlədilmiş, yapışqanlı lentlə sarınaraq qırmızı rəngli rezin şarda qablaşdırılmış, bir ədəd uzunsov bükümdə xalis çəkisi 104,005 qram olan narkotik vasitə - heroin aşkar edilərək götürülüb.

Azərbaycan Respublikasının vətəndaşı, Cəlilabad şəhər sakini Hüseynov Cəlal Sabir oğlu piyada yolla İran İslam Respublikasından Azərbaycana gələrkən, Astara Gömrük İdarəsinin Sərnişin şöbəsində gömrük nəzarətindən keçmiş, qüvvədə olan gömrük qanunvericiliyinin tələblərinə uyğun olaraq, onun üzərində aparılmış şəxsi yoxlama zamanı əyninə geydiyi mavi rəngli cins şalvarının sağ cibindən üst tərəfdən şəffaf rəngli selofana bükülmüş halda, 1 ədəd yastı - dördkünc bağlamada, xalis çəkisi 15.165 qram olan narkotik vasitə - heroin aşkar olunaraq götürülüb.

Astara Gömrük İdarəsində Dövlət Sərhəd Xidməti əməkdaşları ilə birgə keçirilmiş əməliyyat-axtarış tədbirləri nəticəsində Azərbaycan vətəndaşı Əmirov İsrafil Rizvan oğlu piyada yolu ilə İran İslam Respublikasından Azərbaycan Respublikasına gələrkən Sərnişin şöbəsində gömrük nəzarətindən keçmiş, onun üzərində aparılmış şəxsi yoxlama zamanı Əmirov İsrafil Rizvan oğlunun daxili orqanlarına həkim müayinəsi zərurəti yarandığı üçün Astara Rayon Mərkəzi Xəstəxanasına aparılmış, orada həkim müayinəsi zamanı vətəndaş Əmirov İsrafil Rizvan oğlunun düz bağırsağından bir ədəd üst tərəfdən şəffaf rəngli polietilenə bükülmüş yumru formalı bükümdə olmaqla, ümumi çəkisi 26 qram narkotik vasitə - heroin aşkar olunaraq götürülüb.

Astara Gömrük İdarəsində Dövlət Sərhəd Xidməti əməkdaşları ilə birgə keçirilmiş əməliyyat-axtarış tədbirləri nəticəsində Azərbaycan vətəndaşı Mahmudov Fariz Rza oğlu piyada yolu ilə İran dan Azərbaycana gələrkən gömrük nəzarətinə cəlb edilmiş, onun üzərində aparılmış şəxsi yoxlama zamanı Mahmudov Fariz Rza oğlunun ayağına geyindiyi qara rəngli, qaytanlı ayaqqabının sol tayının içərisində, pəncə hissədə bir ədəd üst tərəfdən şəffaf rəngli polietilenə və içəri tərəfdən salfet kağızına bükülmüş yastı-uzunsov formalı bağlama olmaqla, ümumi çəkisi 38 qram təşkil edən narkotik vasitə - heroin və ümumi çəkisi 1 qram təşkil edən tiryək aşkar olunaraq götürülüb.

Biləsuvar Gömrük Sərhəd Buraxılış Məntəqəsində Naxçıvan MR-dan İran İslam Respublikası ərazisindən tranzit keçməklə Azərbaycan Respublikasına gələn AR vətəndaşı Qənbərov Həsən Cəlal oğlunun idarə etdiyi “Temso Safari” markalı, 85AD500 dövlət qeydiyyat nişanlı sərnişin avtobusuna Biləsuvar Gömrük İdarəsinin “Qraf” ləqəbli xidməti itinin tətbiqi ilə baxış keçirilib. Baxış zamanı xidməti itin reaksiyasına əsasən avtobusun salonundan, avtobusun arxa qapısının yanındakı oturacağın alt hissəsində, zavod konstruksiyasında nəzərdə tutulmuş yerdən, selofana bükülərək siqaret qutusunda qablaşdırılmış xalis çəkisi 27,081 qram olan narkotik vasitə - tiryək aşkar edilərək götürülüb.

Biləsuvar Gömrük Sərhəd Buraxılış Məntəqəsində İran İslam Respublikasından Azərbaycan Respublikasına piyada gələn AR vətəndaşı Əliyeva Naibə Qəzənfər qızının üzərində şəxsi yoxlama zamanı, əynindəki mantonun sol yan cibindən, gömrük nəzarətinə bəyan olunmayan, selofana bükülü bir ədəd bükümdə, xalis çəkisi 2.0 qram olan narkotik vasitə - tiryək aşkar edilərək götürülüb.

Astara Gömrük İdarəsi Gömrük hüquqpozmalarına qarşı mübarizə şöbəsinə daxil olmuş əməliyyat məlumatına əsasən, İran İslam Respublikasının vətəndaşı Səhhəti Əhməd Xudaverdi oğlu etibarnamə əsasında idarə etdiyi “Mersedes Benz” markalı 90XK 902 dövlət nömrə nişanlı minik avtomaşını ilə həyat yoldaşı Azrbaycan Respublikasının vətəndaşı Səhhəti Gülnarə Teymur qızı və azyaşlı uşağı Səhhəti Nərgiz Əhməd qızı ilə birlikdə İİR-dən respublikamıza gələrkən Astara Gömrük İdarəsi Sərnişin-nəqliyyat şöbəsində gömrük nəzarətinə cəlb olunmuş, onlara məxsus əl yüklərinə baxış zamanı əl yüklərinin arasında olan uşaq çantasının içərisindən bir ədəd üst tərəfdən qara rəngli polietilenə bükülmüş yumru-uzunsov formalı bağlamada olmaqla, xalis çəkisi 87.774 qram olan qəhvəyi rəngli, kəskin iyli, narkotik vasitə - tiryək, xalis çəkisi 22 qram olan tünd-qəhvəyi rəngli, iyli, narkotik vasitə - həşiş və “Mersedes Benz” markalı 90 XK 902 dövlət nömrə nişanlı minik avtomaşınının sürücü oturacağının altından bir ədəd üzərində “XYLİTOL” yazısı olan yumru formalı plastik qabın içərisindən yeddi ədəd şəffaf rəngli paketdə olmaqla, xalis çəkisi 14.579 qram olan psixotrop maddə - metamfetamin aşkar olunaraq götürülüb.

Astara Gömrük İdarəsi Gömrük hüquqpozmalarına qarşı mübarizə şöbəsinə daxil olmuş əməliyyat məlumatına əsasən Azərbaycan Respublikasının vətəndaşı Səmədov Hacınəsir Yədulla oğlu İrandan Azərbaycana gələrkən, onun üzərində aparılmış şəxsi yoxlama nəticəsində ayağına geydiyi qəhvəyi rəngli ayaqqabının sağ və sol tayının içərisində, ayaqqabının pəncə hissəsinə xüsusi olaraq yerləşdirilmiş şəkildə, hər ayaqqabının içərisində bir ədəd olmaqla, şəffaf rəngli polietilenə bükülmüş, yumru formalı 2 ədəd bağlamada, ümumi xalis çəkisi 50.00 qram olan ağ-sarımtıl rəngli, iyli, narkotik vasitə - heroin aşkar olunaraq götürülüb.

Biləsuvar Gömrük Sərhəd Buraxılış Məntəqəsində İran İslam Respublikasından Azərbaycan Respublikasına piyada gələn Azərbaycan vətəndaşı Əsədov Qurban Əbülfət oğlunun üzərində şəxsi yoxlama aparılıb. Şəxsi yoxlama zamanı o, əynində olan gödəkcənin içəri sol cibində saxladığı 1 ədəd kolba və kolbanın içərisində olan qalın polietilendə qablaşdırılmış bir ədəd uzunsov bükümdə, xalis çəkisi 0,240 qram olan psixatrop maddə - metamfetamini cibindən çıxararaq təqdim edib. Sonra yoxlama davam etdirilib və onun düz bağırsağından 5 ədəd ayrı-ayrı polietilen bükümlərdə olan, gömrük nəzarətindən gizlədilmiş, bozumtul rəngli, bərk halda, ümumi xalis çəkisi 27,050 qram olan narkotik vasitə - heroin aşkar edilərək götürülüb.

Biləsuvar Gömrük Sərhəd Buraxılış Məntəqəsində İran İslam Respublikasından Azərbaycan Respublikasına piyada gələn Azərbaycan vətəndaşı Məmmədova Tamara Əli qızı üzərində şəxsi yoxlama zamanı onun üzərindən, əynindəki plaşın altından boynuna bağlayaraq belindən asdığı qara rəngli ipək yaylığın içərisindən, gömrük nəzarətindən gizlədilmiş, şəffaf selofana bükülü bir ədəd yumru formalı bağlamada, xalis çəkisi 990,0 qram olan narkotik vasitə - tiryək aşkar edilərək götürülüb.