4 avtomobil toqquşdu - Xəsarət alanlar var

Lənkəranda zəncirvari qəza baş verib.

Lent.az-ın verdiyi xəbərə görə hadisə gecə saatlarında şəhərin Heydər Əliyev prospektində Azriba deyilən ərazidə qeydə alınıb.

4 avtomobilin iştirakı ilə baş verən zəncirvari qəzada ilk olaraq "VAZ-21015" markalı nəqliyyat vasitəsi "Mercedes" markalı avtomobillə toqquşub.

"Mercedes" markalı avtomobil yol kənarındakı hasara çırpılıb və hasarı dağıdıb. "VAZ-21015" markalı avtomobil daha sonra yol kənarında hərəkətsiz dayanan "VAZ-2107" markalı avtomobilə, “VAZ-2107” markalı avtomobil də qarşıdakı "Nissan" markalı avtomobilə çırpılıb.

Qəza zamanı iki nəfər 1991-ci il təvəllüdlü Əkbər Emin oğlu Əlizadə və 1982-ci il təvəllüdlü Xəyalə Akif qızı Mustafayeva müxtəlif dərəcəli bədən xəsarətləri alaraq Lənkəran Rayon Mərkəzi Xəstəxanasının təcili yardım şöbəsinə hospitalizasiya olunublar.

Hər iki yaralıya ilkin tibbi yardım göstərilib. Vəziyyətlərinə uyğun olaraq ambulator müalicə üçün evə buraxılıblar.

Qeyd edək ki, qəza nəticəsində hər 4 avtomobilə ciddi ziyan dəyib.

Faktla bağlı araşdırma aparılır.