Polis rəisinə rüşvət verən azərbaycanlı narkotacir HƏBS OLUNDU

Rusiyanın Vladimir vilayətində eyni vaxtda rüşvət və narkotik cinayətləri törədən əcnəbiyə hökm oxunub.

Lent.az xəbər verir ki, Piçuqin küçəsində 19 doza opioidlə yaxalanan Azərbaycan vətəndaşı narkotiklərə nəzarət şöbəsinin rəisinin qarşısına 50 min rubl (təxminən 1082 manat) verərək, zərərini ödəməyə çalışıb.

Vladimir şəhərinin Leninski Rayon Məhkəməsi 35 yaşlı Azərbaycan vətəndaşını iki cinayət törətməkdə təqsirli bilib: narkotik vasitələrin qanunsuz olaraq xüsusilə külli miqdarda əldə edilib saxlanması və vəzifəli şəxsə rüşvət verməyə cəhd.

Cinayət işi Daxili İşlər Nazirliyinin regional idarəsinin köməyi ilə Rusiya Federasiyasının Vladimir vilayəti üzrə İstintaq Komitəsi tərəfindən araşdırılıb.

İstintaq və məhkəmənin məlumatına görə, ötən il sentyabrın 22-də Vladimir şəhərində yaşayan əcnəbi Razin küçəsindəki gizlətdiyi yerdən 19 büküm çəkisi 7 qramdan artıq narkotik vasitə alıb. Piçuqin küçəsi ilə gedən miqrant polis əməkdaşları tərəfindən saxlanılıb.

Vladimir Vilayət Prokurorluğunun dəqiqləşdirdiyi kimi, azərbaycanlı şəhərdə qeydiyyatda olmayıb. Və çantalardakı maddənin tərkibində ən güclü opioidlərdən biri olan karfentail olub.

Narkotiklə tutulan miqrant polisə rüşvət verməyə çalışıb. O, həbs olunduğu gün Rusiya Daxili İşlər Nazirliyinin Vladimir Departamentinin ofisində olarkən 52 min rubl rüşvəti narkotiklərlə mübarizə idarəsinin rəisi vəzifəsini icra edənə verib. O, pulu polis rəisinin masasının üstündəki kitabçanın altına qoyub.

Məhkəmənin hökmü ilə Azərbaycan vətəndaşı ciddi rejimli cəzaçəkmə müəssisəsində 6 il müddətinə azadlıqdan məhrum edilib. Bundan başqa, rüşvət kimi verilmiş 52 min rubl, o cümlədən məhkuma məxsus olan və narkotik vasitəni almaq üçün istifadə etdiyi “iPhone 11 Pro Max” mobil telefonu dövlətin xeyrinə müsadirə edilib.

Hökm qanuni qüvvəyə minməyib və ondan müəyyən edilmiş qaydada şikayət verilə bilər.