Evlərdən külli miqdarda oğurluq edənlər saxlanıldı

Oğurluq etdiyinə görə tutulan R.Meybullayevin ətrafında Binəqədi rayon Polis İdarəsi 43-cü Polis Bölməsinin əməkdaşları əməliyyat tədbirləri aparıblar.

Lent.az Daxili İşlər Nazirliyinə istinadən xəbər verir ki, nəticədə onun avqustun 23-dən sentyabrın 20-dək olan müddətdə rayon ərazisindəki 3 evdən noutbuk, mobil telefon, elektrik naqili, geyim və bəzək əşyaları oğurlaması da müəyyən edilib.

Suraxanı rayon Polis İdarəsi 30-cu Polis Şöbəsinin əməkdaşları oğurluq faktı ilə bağlı əməliyyat-axtarış tədbirləri keçiriblər. Nəticədə rayon ərazisindəki 4 evdən pul və məişət əşyaları oğurlamaqda şübhəli bilinən Bakı şəhər sakini R.Nəhmətov və Ağcabədi rayon sakini R.Kərimov saxlanılıblar.

Qusar rayon Polis Şöbəsinin əməkdaşları oğurluq etdiyinə görə tutulmuş Ş.Əfəndiyevin ətrafında əməliyyat tədbirləri aparıblar. Nəticədə onun avqustun 25-də şəhər ərazisindəki evlərin birindən 15.000 manat dəyərində qızıl-zinət əşyaları oğurlaması da müəyyən edilib.

Lənkəranda inşaat və məişət əşyaları oğurlanıb. Faktla bağlı Lənkəran rayon Polis Şöbəsinin əməkdaşları əməliyyat-axtarış tədbirləri keçiriblər. Nəticədə sentyabrın 11-də şəhər ərazizisindəki həyətyanı sahələrin birindən 810 metr elektrik naqili, 100 metr metal boru, inşaat materialları və məişət əşyası oğurlamaqda şübhəli bilinən şəhər sakini C.Ağayev saxlanılıb.