Lent.az yazdı, APA TV çəkdi, Dərbənd meri hərəkətə keçdi

Nizaminin Dərbənddəki heykəli təmir olundu, “7 gözəl kompleksi” boyadan təmizləndi, parkda abadlıq işlərinə başlandı

“Dərbənddə Nizaminin heykəli və “7 gözəl kompleksi” tam təmir olunub. Heykəlin sınmış hissəsi bərpa edilib, kompleksin üzərinə atılmış boya təmizlənib”. Bu barədə lent.az-a Dərbənddə yaşayan jurnalist Telman Hacıəliyev məlumat verib.

Məlumata görə, lent.az və APA TV-də gedən yazı və süjetlər Dərbənd rayon adminstrasiyasının rəhbəri İmam Yarəliyevin diqqətinə çatdırılıb. Şəhər meri abidə və kompleksin qaydaya salınması barədə göstəriş verib. Bundan başqa Nizaminin adını daşıyan parkda iməcilik keçirilib. Park alaq otlarından təmizlənib, orada güllər əkilib.

Hətta qərara alınıb ki, parkda uşaqların dincəlməyi üçün karusellər, attraksionlar quraşdırılsın.

Xatırladaq ki, bir qədər əvvəl Dərbənddə Nizaminin adını daşıyan parkda şairin heykəli və yaxınlıqdakı “7 gözəl kompleksi” təhqir olunmuşdu.

Bu vandalizm aktı barədə ilk olaraq lent.az xəbər yaymışdı. Hadisədən xəbər tutan kimi APA TV-nin əməkdaşları Dərbənddə olmuş, bu barədə xüsusi süjet hazırlamışdı.