Orxan Zeynalovla bağlı iddiaya sabah baxılacaq

Rusiya Federasiyasının Təhqiqat Komitəsinin Moskva şəhəri üzrə Baş Təhqiqat İdarəsi Yeqor Şerbakovu qətlə yetirməkdə şübhəli bilinən azərbaycanlı Orxan Zeynalovun işi ilə bağlı rəsmi açıqlama yayıb. Lent.az-ın məlumatına görə, idarə rəisi Vladimir Markin bildirib ki, Zeynalov dindirmə zamanı oktyabrın 10-a keçən gecə Şerbakova bıçaqla zərbə endirdiyini boynuna alıb.

Həbs qətimkan tədbiri seçilərkən, həmyerlimizin Rusiya ərazisində 10 ildən çox yaşamasına baxmayaraq, birdən-birə rus dilini unutduğu müəyyənləşib. O, tərcüməçi ilə təmin olunub. Tərcüməçi şübhəli şəxsin iştirakı ilə bütün istintaq hərəkətlərində iştirak edir. Zeynalovun həbsi ilə bağlı iddiaya oktyabrın 17-də baxılacaq.

Markin onu da qeyd edib ki, həmyerlimiz 2011-ci ildə Moskvanın Naqatinsk rayon məhkəməsi tərəfindən “Yol hərəkəti qaydalarının və nəqliyyat vasitələrinin istifadə qaydalarının pozulması” maddəsi ilə 1 il azadlıqdan və 3 il nəqliyyat vasitəsini idarəetmə hüququndan məhrum edilib. 2012-ci ildə o, azadlığa çıxdıqdan sonra avtomobili qanunsuz idarə edərək mal daşınması ilə məşğul olub.

İdarə rəisinin sözlərinə görə, qətli Zeynalovun törətməsinə dair istintaqda kifayət qədər dəlil və əsas var.