Bahodir Nasimov: “Mənim işim qol vurmaqdır” – MÜSAHİBƏ

Lent.az ilk 3 turda vurduğu 5 qolla Unibank Premyer Liqasının bombardiri olan Nasimovla müsahibəni təqdim edir:

- “Neftçi”yə yay transfer dönəmində qoşulan futbolçulardansınız. Özünüzü yeni komandanda necə hiss edirsiniz?

- Bildiyiniz kimi, mən “Rubin”də çıxış edirdim. Kazan klubu Rusiya çempionatının son qalibidir, premyer-liqada mübarizə aparan komandalar arasında güclü rəqabət mövcuddur. Məhz yay transfer dönəmində mənə “Neftçi”də baxışdan keçmək üçün təklif gəldi. Bu komandanın zəngin tarixə malik olduğunu bildiyim üçün həvəslə Bakıya yollandım.

- Bakıya gəldiyiniz ilk oyunda “Qarabağ”a qol vurdunuz. Yeni komandanın heyətində fərqlənmək necə duyğudur?

- Həmin oyundan bir gün əvvəl Bakıya gəlmişdim. Təbii ki, bir az yorğunluq var idi. Buna baxmayaraq, qol vurmaq imkanını əldən vermədim.

- Türkiyə toplanışında da özünüzü yaxşı tərəfdən göstərə bildiniz. Belə təəssürat yaranır ki, hər oyunda qol vurmadan meydanı tərk etmək fikrində deyilsiniz...

- Düşünürəm ki, hücumçunun əsas işi qol vurmaqdır. Təbii ki, “Neftçi”nin forvardı kimi mənim vəzifəm rəqib qapıçıları məyus etməkdir. Hər oyunda üzərimə düşən vəzifənin öhdəsindən gəlmək üçün var gücümlə çalışıram.