Bütün finalçılar müəyyənləşdi

Lent.az-ın məlumatına görə, avqustun 20-də keçirilən seçmə mərhələ yürüşündə 1-ci yeri tutan Bezuqlıy – Prokopenko dueti digər iki yarımqrupun liderləri ilə birbaşa əsas finala yüksəlib. Daha 6 finalçı isə iki yarımfinal yürüşündən sonra məlum olub.

Beləliklə, avqustun 22-də Bakı vaxtı ilə saat 14:14-də startı veriləcək 500 metr məsafəyə final yürüşündə Bezuqlıy –Prokopenko dueti 6-cı cığırda mübarizə aparacaq. Onların rəqibləri Gerasim Koçnev – Serik Mirbekov (Özbəkistan), Roman Rınkeviç – Mariuş Kruk (Polşa), Vitali Verxeles – Denis Kamerilov (Ukrayna), Pavel Petrov – Aleksandr Kostoqlod (Rusiya), Dmitri Rabçanka – Aleksandr Vavçetski (Belarus), Alexandru Dumitresku – Viktor Mixalaki (Rumıniya), Tomas Hall – Benjamin Russell (Kanada), Anton Knezis – Qatis Pranks (Latviya) olacaq.

Qeyd edək ki, Sergey Bezuqlıy – Maksim Prokopenko avqustun 19-da 1000 metr məsafəyə seçmə yürüşü də 1-ci pillədə tamamlayaraq, birbaşa əsas finala çıxıb. Bu məsafəyə final yürüşü avqustun 21-də Bakı vaxtı ilə saat 14:10-da olacaq. Həmin gün Bezuqlıy – Prokopenko cütlüyü 200 metr məsafəyə seçmə və yarımfinal yürüşlərində də çıxış edəcək.