Mourinyodan hacıyevsayağı hərəkət

İspaniyanın “Real Madrid” klubunun baş məşqçisi Joze Mourinyo “Marca” qəzetinin əməkdaşı Anton Meananı söyüb. Lent.az-ın məlumatına görə, portuqaliyalı mütəxəssis jurnalistə “Mənə deyirdilər ki, sən it oğlu və pis insansan. Amma bu dərəcədə olduğunu düşünmürdüm” söyləyib.

Hadisə İspaniya çempionatında “kral klubu”nun “Espanyol”la 2:2 hesablı heç-heçə etdiyi oyunundan sonra mətbuat konfransında baş verib. Mourinyo sözlərinə belə davam edib: “Futbol dünyasında mən və ətrafım zirvədədir, sən isə jurnalistikada nəcissən”.

Baş məşqçinin sözlərinə görə, Meana “Real Madrid”ə və şəxsən ona nifrət edir, bu səbəbdən, təxribatçı suallar verir. Mourinyo Meananın informasiya mənbələrinə diqqətlə yanaşmasının gərəkliyini vurğulayıb.

Qeyd edək ki, özünü Joze Mourinyo ilə müqayisə edən “Neftçi”nin baş məşqçisi Böyükağa Hacıyev də Topaz Premyer Liqasının ötən turunda “Xəzər Lənkəran”a 1:2 hesabı ilə uduzduqları oyunun ardından mətbuat konfransında lənkəranlı jurnalisti təhqir edərək, zaldan qovdurub.