İpoteka kreditləşməsinə maraq artır

İyunun 1-dən bəri müvəkkil banklara edilən müraciətlərdə tələb olunan kredit vəsaitlərinin həcmi 12 milyon manatı keçib

Bu il Azərbaycanda təxminən 70 milyon manata qədər ipoteka kreditinin verilməsi nəzərdə tutulur. Bunun 14 milyon manatı dövlət büdcəsindən, 55 milyon manatı isə Azərbaycan İpoteka Fondunun buraxdığı qiymətli kağızların satışından əldə ediləcək.

Azərbaycan İpoteka Fondundan Lent.az-a bildiriblər ki, ipoteka kreditləşməsi üçün büdcədə nəzərdə tutulmuş 14 milyon manatın hamısı güzəştli şərtlər əsasında sosial ipoteka kreditlərinin maliyyələşməsinə yönəldiləcək. Həmin vəsaitin 2 milyon manatı artıq fondun hesabına köçürülüb. Hazırda fondun müvəkkil bankları həmin vəsaitlərlə borcalanlara ipoteka kreditləri ayırmaqda davam edir.

Fonddan bildiriblər ki, iyunun 1-dən ipoteka kreditləşməsinə başlanandan indiyədək müvəkkil banklara yüzlərlə müraciətlər olunub. Bu günədək banklardan 12 milyon manatdan çox ipoteka krediti istənilib.

O ki qaldı ipoteka kreditləşməsinə marağın az olmasına, Azərbaycan İpoteka Fondunda bu fikirlərlə razılaşmırlar. Fondda bildirirlər ki, Azərbaycanda ipoteka kreditlərinə tələbat böyükdür və bu əvvəlki illərlə müqayisədə müraciət edənlərin sayının çoxluğunda da özünü göstərir. Hazırda fond rəhbərliyi kreditlərin verilməsi qaydalarının ciddi nəzarət edir. Həmçinin ipoteka kreditləri hesabına mənzil almaq istəyənlərin müraciətləri, onların üzləşdiyi problemlər barədə məlumatlar da ciddi araşdırılır.

Elxan SALAHOV