Dairəvi yol payızda hazır olacaq

Avropa standartlarına uyğun inşa edilən 12 kilometrlik yola üçqat asfalt örtüyü çəkiləcək

Ölkənin şimal-cənub nəqliyyat dəhlizini birləşdirən İkinci Dairəvi yol bu ilin payızında istifadəyə veriləcək. Bakı-Şamaxı magistral yolundan başlayıb “Sədərək” yarmarkasının yaxınlığında Birinci Dairəvi yola birləşən bu nəqliyyat qovşağının ümumi uzunluğu 12 kilometrdir.

“Azəryolservis” ASC-dən Lent.az-a bildiriblər ki, ötən ildən inşasına başlanmış avtomobil yolunda əsas tikinti işləri başa çatmaq üzrədir. Belə ki, layihədə nəzərdə tutulmuş işlərin 95 faizi yerinə yetirilib. İndiyədək yol üzərində 60 metr uzunluğunda 1 körpü və 9 su ötürücü qurğu inşa edilib, ərazidəki bataqlıq qurudulub.

Xatırladaq ki, yolun tikintisini Nəqliyyat Nazirliyinin sifarişi ilə “Texnika-A servis” şirkəti aparır. Layihəyə əsasən, uzunluğu 12 kilometr, eni 20 metr olan 4 zolaqlı yolda üçqat asfalt örtüyü çəkiləcək. Artıq 9,5 kilometrlik hissədə asfaltın 1-ci və 2-ci qatları vurulub.

Elxan SALAHOV