“Eurovision” qalibimiz : “Azadam” –

Lent.az-ın məlumatına görə, ilk solo işini jurnalistlərin qarşısına çıxaran Eldar Qasımov yeni işindən danışıb: “Mahnının hit olacağını əvvəldən bilirdim. Çünki hər bir insanın həyatında elə anı olur ki, o özünü azad hiss edir. Baxmayaraq ki, azadlıq hissləri də müəyyən çərçivədə olmalıdır. Amma ümumilikdə özünü azad hiss etmək gözəldir”.

Müğənni bildirib ki, klipin çəkilişlərində rejissor seçmək üçün tender elan edilib. Bir neçə rejissorun işinə baxılıb. Sonda isə Ukraynadan olan çəkiliş qrupu ilə razılığa gəlinib. Layihə bütünlüklə Ukraynanın məşhur Euomedia Group şirkətinin komandası tərəfindən hazırlanıb. Layihənin ideya müəllifi və rejissoru Denis Qamzinov, operatoru Dmitriy Peretrutovdur. Klipin ərsəyə gəlməsi üçün nə az, nə çox düz 200 nəfər çalışıb.
Məşqlər zamanı ayağının burxulduğunu deyən müğənni klipdə axsaq vəziyyətində rəqs etdiyini də deyib. Eldar Qasımov klipə sərf olunan vəsaitin kommersiya sirri olduğu üçün açıqlamayıb: “Əgər sənətçi puldan danışırsa, onun kimliyi itir. Mən çalışdım ki, burada öz işimi çatdırım”.

Azərbaycan dilində mahnı hazırladığını söyləyən Eldar Qasımov bildirib ki, gələcəkdə azərbaycanlı rejissorlarla da yeni iş görməyi planlaşdırır.

Şəxsi həyatı ilə bağlı açıqlamalar verən müğənni bildirib ki, onun həyatında sevdiyi şəxs var və müğənni özünü xoşbəxt hiss edir.

Jalə