Azərbaycanda ilk dəfə həyəcan dolu Zone reality düşərgəsi keçiriləcək

Yeni layihəsi ilə yenidən gənclərin qarşısına çıxan “Flame production” avqustun 30-dan sentyabrın 5-ə kimi “Zone reality” düşərgəsi keçirəcək.

“Zone Reality” layihəsinin rəhbəri Günel Teymurun Lent.az-a verdiyi məlumata görə, 18-35 yaşlı hər kəs düşərgədə ola bilər. Layihənin əsas məqsədi fiziki və zehni cəhətdən bilik və bacarıqları inkişaf etdirməklə yanaşı, iştirakçılara əyləncə dolu anlar yaşatmaqdır: “Layihə ərzində dünyaca məşhur olan Survivor, Fear factor, Wipe out və digər reality proqramlarının ən maraqlı oyunları, eyni zamanda “Brain ring”, “Kim, Harada, Necə?” kimi intellektual oyunlar keçiriləcək. Bu da gənclər arasında həm fiziki, həm də məntiqi təfəkkürü inkişaf etdirəcək. Hər günün sonunda yaşanmış həyəcan dolu dəqiqələr və maraqlı anlar Zone Reality Online TV –də müntəzəm olaraq yayımlanacaq. Oyunlarda xüsusi fərqlənib ən çox bal toplamış iştirakçıya və qalib komandaya sponsorlar tərəfindən qiymətli hədiyyələr veriləcək”.

G.Teymur bildirib ki, layihədə iştirak üçün ərizə qəbulu başlayıb. Layihəyə ərizə qəbulunun son tarixi 25 avqustdur.

Xəyalə