Aysel Teymurzadə “Turkvision”nun açılışında iştirakdan imtina edib

“Eurovision-2009” mahnı müsabiqəsində Azərbaycanı təmsil edən Aysel Teymurzadə Türkiyədə keçiriləcək “Turkvision” yarışmasına dəvət olunub. APA-nın məlumatına görə, sözügedən müsabiqə 23-28 iyun tarixlərində Türkiyənin Pamukkale turizm zonasında keçirilməsi nəzərdə tutulub. Türkdilli dövlətlərinin təmsil olunacağı müsabiqə Türkiyənin TRT kanalı ilə canlı yayımlanacaq. Müsabiqənin açılış mərasimində çıxış etmək üçün isə “Eurovision-2009” müsabiqəsində Azərbaycanı təmsil edən Aysel Teymurzadə və Türkiyəni təmsil edən Hadisə Açıqgöz dəvət olunub. A. Teymurzadənin ailəsindən APA-ya bildirilib ki, gənc müğənni həmin ərəfədə başqa ölkədə səfərdə olması səbəbindən bu dəvəti qəbul edə bilməyib. A. Teymurzadə həmin vaxt Yunanıstanda səfərdə olacaq və orada duet ortağı Araşla birgə konsert proqramı ilə çıxış edəcək. Məlumatda o da bildirilib ki, Aysel Teymurzadə bu gün İsveçə yola düşüb. Müğənni İsveçdə Araşla birgə bir neçə layihəni həyata keçirmək niyyətindədir.