Lüks, ziyafət və qırmızı xalı dünyasında bir qədəh şampana "yox" demək asan deyil. Lakin bəzi Hollivud ulduzları spirtli içkilərdən imtina edərək göstərirlər ki, əyləncə aləmində sağlam həyat tərzini seçmək mümkündür.
Lent.az xarici mediaya istinadla hansı ulduzların bu vacib addımı atdığını açıqlayır.
Naomi Kempbell
55 yaşlı britaniyalı supermodel və aktrisa Naomi Kempbell keçmişdə spirtli içkilər və narkotiklərlə bağlı problemlər yaşamışdı. 1998–2005-ci illər arasında o, bu maddələrdən kədər və stresslə mübarizə aparmaq üçün istifadə etdiyini etiraf etmişdi.
1999-cu ildə Kempbell kömək üçün müraciət edərək reabilitasiya kursu keçmişdi. 2010-cu ildə o, artıq spirtli içki qəbul etmədiyini və onsuz özünü daha yaxşı hiss etdiyini bildirmişdi.
2024-cü ildə o, ayıqlığın onun həyatının vacib hissəsi olduğunu bir daha təsdiqlədi və deyib: "Mən həyatımdakı spirtli içki üçün darıxmıram".
Zak Efron
37 yaşlı amerikalı aktyor və müğənni Zak Efron hazırda spirtli içkilərdən istifadə etmir. 2013-cü ildə o, spirtli içki və kokainlə bağlı problemlərinə görə reabilitasiya mərkəzinə müraciət etmişdi. Müalicədən sonra Efron ayıqlığını qorumaq və həyat tərzini dəyişmək üçün fəal çalışıb.
O bildirib ki, fiziki aktivlik ona ayıq qalmağa kömək edib. Həmçinin qorxularını aşmağın şəxsi inkişaf üçün önəmli olduğunu vurğulayıb.
Hazırda o, sağlamlığını və karyerasını qoruyaraq ayıq həyat tərzini davam etdirir.
Dru Berrimor
50 yaşlı amerikalı aktrisa və prodüser Dru Berrimor şəxsi həyatı ilə bağlı problemləri açıq şəkildə paylaşması ilə tanınır. O, çox gənc yaşda spirtli içkilər qəbul etməyə başlayıb və narkotiklər, reabilitasiya ilə üzləşib.
2019-cu ildə o, spirtli içkilərdən tamamilə imtina etdi ki, bu da onun həyatında vacib addım olub. 2021-ci ildə o, bu qərarını ictimaiyyətə açıqlayıb və spirtli içkini "zəhərli davranış" və "zəhər" adlandırıb.
2024-cü ildə o, artıq beş ildən çoxdur ki, spirtli içki qəbul etmədiyini bir daha təsdiqləyib.
Bleik Layvli
37 yaşlı amerikalı aktrisa və model Bleik Layvli spirtli içkilər qəbul etmir və heç vaxt qəbul etməyib. 2012-ci ildə verdiyi müsahibədə o, spirtli içki içmədiyini və heç vaxt narkotik qəbul etmədiyini bildirib.
2020-ci ildə o, spirtli içki qəbul etməməsinin səbəbini onun təsirlərini sevməməsi ilə izah edib, baxmayaraq ki, o, sosial tədbirləri və bayram atmosferini xoşlayır.
Bununla belə, 2023-cü ildə Layvli "Betty Booze" adlı konservləşdirilmiş alkoqollu kokteyllər seriyasını istifadəyə verdi ki, bu da müəyyən tənqidlərə səbəb olub. Çünki o, özü spirtli içki qəbul etmir. Lakin o vurğulayıb ki, bu içkiləri başqaları üçün yaradıb, çünki bişirməyi və qonaqları ləzzətli içkilərlə qonaq etməyi sevir.
Cim Kerri
63 yaşlı kanadalı-amerikalı aktyor Cim Kerri spirtli içkilər qəbul etmir və uzun illərdir ki, ayıq həyat tərzini davam etdirir.
2004-cü ildə verdiyi müsahibədə o deyib: "Mən narkotik və spirtli içkilərdən imtina məsələsinə çox ciddi yanaşıram. Həyat çox gözəldir".
O, həmçinin nadir hallarda qəhvə içdiyini vurğulayaraq hər hansı stimulyatorlardan uzaq durmağa çalışdığını bildirib.
Əvvəllər aktyor depressiya ilə mübarizə üçün müxtəlif maddələrdən istifadə etsə də, sonradan onlardan imtina edərək indiki anı daha yaxşı dərk etməyə və mənəvi inkişafına diqqət yetirməyə üstünlük verib.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
