Zaur Baxşəliyev: “O uşaq mənim deyil”

Teleaparıcı Zaur Baxşəliyev xəbər saytlarında övladı kimi təqdim olunan balaca qızcığazdan danışıb. O, Lent. az-a bildirib ki, haqqında dolaşan xəbər yanlışdır: “Xəbərlər portallarında yayılan şəkildəki uşaq, mənim övladım deyil. Hər kimin balasıdırsa, Allah saxlasın. Mən övladımın fotoşəklini və görüntüsünü heç bir yerdə yayımlamamışam və belə bir fikrim də yoxdur. Nə mən, nə də Günay xanım ( həyat yoldaşını nəzərdə tutur) heç bir sosial şəbəkədə yoxuq. Bu şəkli yayımlayan insanlardan xahiş edirəm ki, o körpəni mənim övladım kimi təqdim etməsinlər. Bu, həmin uşağın valideynlərinə təhqirdir. İstər ATV kanalında yayımlanan “Onlar” verilişi, istərsə də digər saytlar bu məsələni ən azından mənim özümdən dəqiqləşdirə bilərdilər. Çünki mənim bütün mətbuat orqanlarına hörmətim var. Və bu hörmətin qarşılıqlı olmasını arzulayıram. Mən öz övladım və ailəmlə heç vaxt gündəmdə olmamışam və belə bir fikrim də yoxdur. Başqasının körpəsini mənim övladım kimi təqdim etmək çox gülüncdür”.