Paltaryuyan maşından gələn pis qoxunun səbəbi nədir?

Paltaryuyan maşın paltarların təmiz qalmasına kömək etsə də, zaman-zaman onun özü də qulluğa ehtiyac duyur. Mütəxəssislər bildirirlər ki, bir neçə sadə vərdiş xoşagəlməz qoxunun qarşısını almağa və məişət texnikasının uzunömürlü olmasına kömək edir.

Lent.az xəbər verir ki, mütəxəssislərin sözlərinə görə, paltaryuyan maşında yaranan kif iyi adətən cihazın daxilində və ya ətrafında toplanan nəmlə əlaqədardır. Buna texniki nasazlıqlar, məsələn, su sızması, eləcə də paltarların yuyulduqdan sonra uzun müddət barabanda saxlanılması, yüksək rütubət və maşının kifayət qədər təmizlənməməsi səbəb ola bilər. Kif və hava keyfiyyəti üzrə mütəxəssis Maykl Rubinonun sözlərinə görə, durğun nəm yalnız kifin əmələ gəlməsi üçün deyil, həm də bakteriyaların çoxalması üçün əlverişli şərait yaradır. O bildirib ki, xoşagəlməz qoxunun digər səbəbi yuyucu vasitələrin, yumşaldıcının, çirkin, mineral çöküntülərinin və digər qalıqların zamanla maşının daxilində yığılmasıdır. Əgər yaş paltar çıxarıldıqdan sonra da qoxu qalırsa, maşının daxilində və ətrafında kif olub-olmadığını yoxlamaq lazımdır. Xüsusilə baraban, qapının rezin contası, yuyucu vasitə qabı və suyun axdığı hissələr diqqətlə yoxlanmalıdır.

Pis qoxunun qarşısını necə almaq olar?

Əksər hallarda düzgün qulluq xoşagəlməz qoxunun yaranmasının qarşısını alır. Problem texniki nasazlıq və ya su sızması ilə bağlıdırsa, ilk növbədə həmin problem aradan qaldırılmalıdır. Maykl Rubino hər yuyulmadan sonra maşının qapısını və ya qapağını, həmçinin yuyucu vasitə qabını açıq saxlamağı tövsiyə edir ki, içəridəki nəm tam qurusun. Bundan əlavə, yuyulmuş paltarlar proqram bitən kimi maşından çıxarılmalıdır. Mütəxəssis qeyd edir ki, nəm mühit olduqda kif cəmi 24-48 saat ərzində yaranmağa başlaya bilər. O, xüsusilə ön tərəfdən yüklənən paltaryuyan maşınlarda rezin contaların mütəmadi silinməsini də məsləhət görür. Çünki həmin hissədə su daha çox toplanır. Bundan başqa, yuyucu vasitənin növü və miqdarı da istehsalçının tövsiyəsinə uyğun seçilməlidir.

Davamlı qoxudan necə xilas olmaq olar?

Əgər xoşagəlməz qoxu artıq yaranıbsa, sadəcə maşını havalandırmaq kifayət etməyə bilər. Rubinonun sözlərinə görə, bu halda ən yaxşı həll yolu paltaryuyan maşının dərin təmizlənməsidir. O, təmizliyə başlamazdan əvvəl istehsalçının təlimat kitabçası ilə tanış olmağı tövsiyə edir. Çünki müxtəlif modellər üçün təmizləmə qaydaları fərqli ola bilər.

Paltaryuyan maşını necə təmizləmək olar?

1. Drenaj hissəsini təmizləyin

İstehsalçının təlimatına uyğun olaraq drenaj filtrini yoxlayın və orada toplanmış tük, sap, kir və digər tullantıları təmizləyin. Kiçik miqdarda çirk belə xoşagəlməz qoxuya səbəb ola bilər.

2. Yuyucu vasitə qabını yuyun

Yuyucu vasitə qabını çıxarıb təmizləyici məhlulda saxlayın. Onun yerləşdiyi hissəni də yaxşı təmizləyin. Çünki burada yuyucu vasitə qalıqları və nəm yığılır.

3. Barabanı və digər hissələri təmizləyin

Barabanı, rezin contaları, qapağı və digər əlçatan səthləri uyğun təmizləyici vasitə ilə silin. Vasitəni bir neçə dəqiqə saxladıqdan sonra mikrofiber parça ilə təmizləyin. Maşının xarici səthini və ətrafındakı sahəni də təmiz saxlamaq vacibdir. Çünki nəm otaqlarda qoxu ətrafa da yayıla bilər.

4. Təmizləmə proqramını işə salın

Əl ilə təmizlədikdən sonra maşının özünü təmizləmə proqramını və ya ən isti və ən uzun yuma rejimini boş vəziyyətdə işə salın. Əgər cihazda belə proqram yoxdursa, paltarsız şəkildə adi isti yuma rejimindən istifadə etmək olar. Proses başa çatdıqdan sonra qapını, qapağı və yuyucu vasitə qabını açıq saxlayın ki, maşının içi tam qurusun. Bundan əvvəl mütəxəssislər paltaryuyan maşınlarda olan Eco rejiminin nə vaxt istifadə edilməli olduğunu da izah ediblər. Bildirilib ki, bu proqram minimum su və elektrik sərf etməklə paltarları səmərəli şəkildə yumaq üçün nəzərdə tutulub. Həmçinin ekspertlər xəbərdarlıq ediblər ki, paltaryuyan maşını sirkə və qida sodasının qarışığı ilə təmizləmək düzgün deyil. Onların sözlərinə görə, bu üsul cihazın bəzi hissələrinə zərər verə bilər.