Qarpız qabığı faydalıdır - onu hazırlamağın 5 üsulu

Araşdırmalara görə, qarpızın ağ hissəsində onun qırmızı lətindən dörd dəfə çox lif var. ABŞ Kənd Təsərrüfatı Nazirliyi (USDA) ilk dəfə qarpız qabığını ayrıca qida maddələri bazasına daxil edib.

Lent.az bu 5 üsulu təqdim edir:

Artıq qarpızın yalnız şirəli lətini deyil, adətən tullanan ağ hissəsini də yeyən şəxslər orqanizmin nə qədər kalori, vitamin və mineral qəbul etdiyini dəqiq hesablaya bilərlər. 150 qram doğranmış qarpız qabığında təxminən 29 kalori, 1 qram zülal, 2 qram lif, 408 mq kalium, 11 mq C vitamini və 45 mkq fol turşusu var. Müqayisə üçün, USDA məlumat bazasına əsasən, bir stəkan qarpız lətində lifin miqdarı təxminən dörd dəfə azdır cəmi 0,6 qram.

Dietoloq Loren Maneykerin sözlərinə görə, qarpız qabığındakı lif həzm sistemini dəstəkləyir, kalium isə əzələlərin və sinir sisteminin normal fəaliyyəti üçün vacibdir. Qarpız qabığında sitrullinin miqdarı lət hissəsindən daha çoxdur. Bunun praktik faydası da var. Qabıq bütöv qarpızın çəkisinin təxminən 30 faizini təşkil edir. Buna görə onu da istifadə etdikdə qida tullantılarının miqdarı xeyli azalır.

Adətən atılan qarpız qabığını yeməyin 5 üsulu

Turşuya qoymaq. Marinad edilmiş qarpız qabığını salatlara, sendviçlərə və ya ət məhsullarının yanına əlavə etmək olar. Belə hazırlanan qabıq soyuducuda iki həftəyədək saxlanıla bilər. Maneyker qarpızı doğramazdan əvvəl mütləq yaxşı yumağı məsləhət görür ki, qabığın üzərindəki bakteriyalar lətə keçməsin.

Qızartmaq. Qarpız qabığı sürətli qızartma üsulu ilə hazırlanan yeməklər üçün uyğundur və yeməyə təzə xiyar dadına bənzər çalar verir. Dietoloqun sözlərinə görə, qabığın az miqdarda yağ və ədviyyatla qısa müddət qızardılması onu yumşaldır və həzmini asanlaşdırır. Qısa bişirmə müddəti isə C vitamini kimi istiliyə həssas qida maddələrinin itkisinin azalmasına kömək edir. Smuziyə əlavə etmək. Təzə və ya dondurulmuş qarpız qabığını giləmeyvə və göyərti ilə birlikdə blenderdən keçirmək olar. Qarışığı buz qəliblərində donduraraq daha sonra smuzi üçün hazır baza kimi istifadə etmək mümkündür. Beləliklə, içkiyə əlavə lif, kalium və sitrullin də daxil olur.

Çiy yemək. Çiy qarpız qabığı dad və tekstura baxımından hikamaya Meksika kartofuna bənzəyir. O, xırtıldayan və bir qədər dadsız olur. Lət hissəsi qədər şirin deyil və yüngül acılığa malikdir. Buna görə də hər kəsin zövqünə uyğun olmaya bilər.

Şorbaya əlavə etmək. Kub şəklində doğranmış qarpız qabığı şorba, raqu və çili yeməklərinə xırtıldayan tekstura verir. Yayda isə onu qarpızın ləti ilə birlikdə sərinləşdirici qaspaço hazırlamaq üçün istifadə etmək olar. Bu üsul qarpızı demək olar ki, tam istifadə etməyə imkan verir.

Qidalanma ilə bağlı məsləhət

Qarpız qabığı əvvəllər adətən tullanan, lakin faydalı ola biləcək yeganə meyvə hissəsi deyil. Alimlərin məlumatına görə, şaftalının qabığında da onun lətində olmayan əlavə lif və antioksidantlar mövcuddur. Lakin qarpızdan fərqli olaraq burada bir məqam var: şaftalı qabığında pestisid qalıqları daha çox toplana bilər. Buna görə meyvə yeyilməzdən əvvəl axar su altında yaxşıca yuyulmalıdır.