Azərbaycanda ilk! Direktor işə velosipedlə gəlir - EKSKLÜZİV -

Bu ilkə imza atan şəxs Bakı Uşaq Teatrının yaradıcısı və direktoru İntiqam Soltandır. İntiqam Soltan Lent.az-a bildirib ki, onu buna vadar edən səbəb tıxaclarla bağlıdır. İki avtomobili olduğu halda, bu gündən etibarən işə velosipedlə gəlməyi tıxaclara etiraz əlaməti kimi də qiymətləndirilə bilər.

“Düz bir həftədir velosipedlə gələ bilməyim üçün lazımi yollar axtarırdım. Nəhayət, bu gün dolanbac yollarla işə gəlib çatdım”, - deyən İntiqam Soltan 12 kilometr yolu 1 saat 10 dəqiqəyə qət edib. Amma yol boyu müəyyən problemlərlə də qarşılaşıb: “Təbii ki, yol hərəkəti qaydalarına maksimum dərəcədə riayət etməyə çalışdım. Ancaq çox təəssüf ki, sürücülər, xüsusən də avtobus idarə edən şəxslər çox etinasız yanaşırlar”.

İntiqam Soltan onu da bildirib ki, bu gün Bakı Uşaq Teatrı mövsümün ilk tamaşasını göstərəcək. Bu, Mehman Dilqəmoğlunun nağıllar əsasında səhnələşdirdiyi “Əhmədin yuxusu” tamaşasıdır.

Xəyalə Muradlı