Qış aylarında dəri soyuq hava, quru mühit və kəskin küləyin eyni vaxtda təsiri altında qalır. Bu şəraitdə yay mövsümündə problemsiz istifadə olunan kosmetik vasitələr qışda tamamilə fərqli təsir göstərə bilər. İsti havada zərər verməyən məhsullar qışda qıcıqlanma, quruluq və hətta iltihaba səbəb ola bilər.
Lent.az xarici mediaya istinadla xəbər verir ki, mütəxəssislər gündəlik dəri baxımını yenidən nəzərdən keçirməyi və aqressiv tərkibli vasitələrdən müvəqqəti imtina etməyi tövsiyə edirlər.
Qışda dəri niyə daha həssas olur
Dermatoloq Papri Sarkar izah edir ki, soyuq hava, aşağı rütubət və şaxtalı küləklər dərinin qoruyucu baryerini tədricən zədələyir. Bu baryer pozulduqda dəri nəmi saxlamaqda çətinlik çəkir və xarici qıcıqlandırıcılara qarşı daha həssas olur. Nəticədə quruluq, qabıqlanma, qaşınma və qızartı kimi problemlər ortaya çıxır.
Bununla belə, qış şəraiti hər kəsdə eyni problemləri yaratmır. Əgər dəri bu dövrdə ciddi reaksiya vermirsə, baxımı köklü şəkildə dəyişməyə ehtiyac yoxdur. Amma mütəxəssislər yenə də daha qidalandırıcı kremlərə, yumşaq təmizləyici vasitələrə keçməyi və aktiv komponentlərin istifadəsini məhdudlaşdırmağı məsləhət görürlər. Qıcıqlanmanı müalicə etməkdənsə, onun qarşısını almaq daha məqsədəuyğundur.
Qışda sabun istifadəsini məhdudlaşdırmaq tövsiyə olunur
Qış aylarında tez-tez və bol sabun istifadə etmək dərinin həddindən artıq qurumasına səbəb ola bilər. Dermatoloqlar bildirir ki, sabun yalnız həqiqətən ehtiyac olan nahiyələrdə – qoltuqaltı və intim bölgədə istifadə edilməlidir. Bədənin digər hissələri üçün ilıq su və ya yumşaq yuyucu gellər kifayətdir. Adi bərk sabunlar yüksək pH səviyyəsinə malik olduğu üçün dərini daha da qurudur. Buna görə qışda gel və ya krem əsaslı, zərif təmizləyici məhsullara üstünlük verilməlidir.
Spirt tərkibli toniklərdən uzaq durmaq lazımdır
Yağlı dəri üçün nəzərdə tutulan bir çox tonik yüksək miqdarda spirt ehtiva edir. Soyuq mövsümdə bu cür məhsullar dərini ciddi şəkildə quruda və qoruyucu baryeri zəiflədə bilər. Mütəxəssislər spirtin əsas tərkib hissəsi olduğu toniklərdən imtina etməyi tövsiyə edirlər. Tonikdən tamamilə vaz keçmək çətindirsə, spirtsiz və nəmləndirici tərkibli məhsullar seçilməlidir.
Gil maskaları qışda daha az istifadə edilməlidir
Gil maskaları məsamələri effektiv şəkildə təmizləsə də, dəridən çoxlu nəmi də özünə çəkir. Yayda bu təsir hiss olunmur, lakin qışda quruluğu gücləndirə və qızartıya səbəb ola bilər. Mütəxəssislər bu tip maskaların istifadəsini azaltmağı və ya onları yumşaq, nəmləndirici maskalarla əvəz etməyi məsləhət görürlər.
Qışda pilinqin tezliyi azaldılmalıdır
Piling dəri baxımının vacib mərhələsi olaraq qalır, lakin qışda dərinin zədələnmə riski artır. Dermatoloqlar pilinqi daha nadir hallarda etməyi və yumşaq formulalara üstünlük verməyi tövsiyə edirlər. Qlikol, badam və ya salisil turşusu əsasında olan kimyəvi pilinqlər effektivdir, lakin əsas məsələ onların tez-tez tətbiq edilməməsidir.
Kəskin ətirlər və efir yağları risk yarada bilər
Ətirli kremlər və serumlar xoş hiss yaratsa da, qış aylarında dəri onlara daha həssas reaksiya verə bilər. Qoruyucu baryer zəiflədiyi üçün əvvəllər problem yaratmayan maddələr belə diskomfort və qıcıqlanmaya səbəb ola bilər. Buna görə qış mövsümündə ətirsiz və efir yağları olmayan kosmetik vasitələr seçmək və ya bu cür məhsullardan istifadə edərkən dərinin reaksiyasını diqqətlə izləmək tövsiyə olunur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
