Zərərli hesab etdiyimiz, lakin ömrü uzadan QİDA

Həkimlər bir çoxunun uzaq durmağa çalışdığı məhsulların inanılmaz faydasından danışıblar. Bir çox insanlar karbohidratları sağlamlıq və ideal bədən forması üçün ən təhlükəli düşmən sayır.

Lent.az-ın xarici KİV-ə istinadla xəbərinə görə, lakin uzunömürlülüyü araşdıran tədqiqatçı Den Byuttner bunun yanlış fikir olduğunu bildirir. Əslində, karbohidratlar düşmən deyil, sağlamlıq və uzunömürlülük uğrunda mübarizədə vacib müttəfiqdir.

100 yaşına qədər yaşamaq istəyənlər hansı məhsulu yeməlidir?

Niyə karbohidratlar uzunömürlülük üçün faydalıdır?

Byuttnerin sözlərinə görə, uzun ömür sürən insanlar rasionlarını mürəkkəb karbohidratlar əsasında qururlar. O qeyd edir ki, bu karbohidratlar dünyanın "Mavi Zonaları" adlanan bölgələrində - yəni uzunömürlü insanların sıx yaşadığı yerlərdə - əsas qida mənbəyidir. Bu zonalarda insanlar aktiv şəkildə lobya, mərcimək, tam taxıllı məhsullar, yaşıl tərəvəzlər və şirin kartof (batat) yeyirlər.

Problem ondadır ki, bir çox insan “karbohidrat” sözünü yalnız zərərli qidalar - ağ çörək, tort və şirniyyatlarla əlaqələndirir. Əslində isə sağlamlıq üçün zərərli olan sadə və yüksək dərəcədə emal olunmuş karbohidratlardır. Onlar qan şəkərində kəskin sıçrayışlara və həddindən artıq yeməyə səbəb olur.

Mürəkkəb karbohidratlar isə əksinə, tədricən sorulur, uzun müddət toxluq hissi yaradır, enerjini sabit saxlayır və maddələr mübadiləsinin normal getməsinə kömək edir.

Elm nə deyir?

Mürəkkəb karbohidratlar uzun şəkər zəncirlərindən ibarətdir və tədricən parçalanaraq qanda kəskin qlükoza artımına səbəb olmur. Bundan əlavə, onlar zərərli qəlyanaltılara qarşı istəyin azalmasına kömək edir. Bu karbohidratların müntəzəm qəbulu 2-ci tip şəkərli diabet, ürək-damar xəstəlikləri və piylənmə riskini azaldır.

Ekspert vurğulayır ki, balanslaşdırılmış qidalanmada zülal və yağlar da olmalıdır, lakin uzun və aktiv həyat arzulayanlar üçün əsas qida mənbəyi məhz mürəkkəb karbohidratlar olmalıdır.

Orqanizmə gündə nə qədər karbohidrat lazımdır?

Dəqiq gündəlik tələbat yaşdan, cinsdən və fiziki aktivlikdən asılıdır. Lakin Avropa Qida Təhlükəsizliyi Agentliyinin məlumatına görə, orta hesabla tövsiyə edilən gündəlik norma 260 qram karbohidrat təşkil edir.

Nəticə

Karbohidratlardan qorxmaq lazım deyil - əsas olan düzgün olanları seçməkdir. Lobya, tam taxıllı məhsullar, tərəvəzlər və kök yumrular təkcə dadlı deyil, həm də gələcək onilliklər üçün sağlamlığınıza qoyulan sərmayədir.