Qənirə Paşayeva İsrailin 3 böyük universitetini ziyarət edib

İsrailin Hayfa şəhərində “Elm, Texnologiya və İnnovasiya: Qadın və Qızlar üçün Təhsil və Treyninq” Qadın Liderlərin Beynəlxalq Konfransında iştirak edən millət vəkili, Avropa Şurası Parlament Assambleyasının gender bərabərliyi komitəsinin üzvü Qənirə Paşayeva konfrans çərçivəsində İsrailin 3 böyük universitetini ziyarət edib.

Qənirə Paşayevanın Lent.az-a verdiyi məlumata görə, o, Hayfa Universitetinin prezidenti Aaron Ben Zeev və rektoru David Faraqi, Herbu Universitetinin, Veizman Elm İnstitutunun rəsmiləri ilə görüşüb.

Bu ali məktəblərin rəsmiləri Azərbaycanla elm, təhsil sahəsində əməkdaşlığın qurulmasında maraqlı olduqlarını vurğulayıblar. Qənirə Paşayeva onlara və universitetlərin kitabxanalarına Azərbaycan həqiqətlərini, Ermənistanın işğal etdiyi Azərbaycan torpaqlarında törətdiyi vandalizm aktlarını özündə əks etdirən materiallar, eyni zamanda Azərbaycan tarixi, mədəniyyəti, musiqisini özündə əks etdirən kitablar və materiallar təqdim edib.

Millət vəkili Hayfa şəhərinin meri Yona Yahav, merin müavinləri ilə də görüşüb. Qənirə Paşayeva onları Bakıya dəvət edib. Mer və merin müavinlərinə də Azərbaycan həqiqətlərini, Ermənistanın işğal etdiyi Azərbaycan torpaqlarında törətdiyi vandalizm aktlarını, o cümlədən Azərbaycan musiqisi və mədəniyyəti ilə bağlı materiallar təqdim edilib.