Türkiyə şirkəti Silahlı Qüvvələrimiz üçün reaktiv raket istehsalına başlayıb

Bu barədə APA-ya açıqlamasında ROKETSAN şirkətinin baş direktoru Hüseyn Baysak məlumat verib.

Artıq layihə çərçivəsində Azərbaycan Silahlı Qüvvələrinin sifariş verdiyi reaktiv raketlərin istehsalına başladıqlarını deyən H. Baysak 2011-ci ilin sonu, 2012-ci ilin əvvəlində ilk məhsul partiyasının Azərbaycana çatdırılacağını vurğulayıb.

«Paralel olaraq Müdafiə Sənayesi Nazirliyi ilə də ortaq istehsalla bağlı görüşlərimiz davam edir. Buna yönəlik ilk prinsipial anlaşma protokolu bu ilin fevralında Abu-Dabi şəhərində İDEX sərgisi çərçivəsində imzalandı. Hazırda müvafiq müqavilənin imzalanması istiqamətində işlər davam etdirilir və düşünürəm ki, müqaviləni bu il ərzində imzalayacağıq», - deyə H. Baysak vurğulayıb.

Şirkət rəhbəri Azərbaycan Ordusu üçün Müdafiə Sənayesi Nazirliyi ilə birgə «Sakarya» reaktiv yaylım atəş sistemlərinə bənzər raket buraxılış qurğusunun birgə istehsalının da həyata keçiriləcəyini bildirib: «Bununla bağlı müzakirələrimiz davam etdirilir. Düşünürəm ki, bu qarşıdakı dövrlərdə mümkün olacaq».

H. Baysak əlavə edib ki, Azərbaycanla birgə istehsal olunacaq artırılmış mənzilli 107 və 122 mm çaplı raketlərin motorları Türkiyədə ROKETSAN tərəfindən istehsal olunacaq. Onlar Bakıda MSN-in istehsalı olan qəliblərə yerləşdiriləcək.