ADU-da “Mən nəyi bilirəm” müsabiqəsi keçiriləcək

Qalibləri Fransa səfirliyi mükafatlandıracaq

Mayın 16-da Azərbaycan Dillər Universitetinin (ADU) Fransız dili fakültəsində Heydər Əliyevin anadan olmasının 86-cı ildönümünə həsr olunmuş “Que Sais-je” (“Mən nəyi bilirəm”) mövzusunda müsabiqə keçiriləcək. Bu barədə Lent.az-a ADU-nun mətbuat xidmətindən məlumat verilib. Fransız dilinin leksikologiyası və üslubiyyatı kafedrasının və dosent Gülnarə Sadıxovanın təşkilatçılığı ilə baş tutacaq müsabiqədə fakültə tələbələrindən ibarət 6 komanda iştirak edəcək. Qalib tələbələr Fransanın Azərbaycandakı səfirliyindən ADU-ya hədiyyə olunan 10 ədəd “Rober” - İzahlı lüğətlə mükafatlandırılacaq.
Müsabiqənin məqsədi Fransanın sivilizasiyası, mədəniyyəti haqqında tələbələrin hansı biliklərə malik olduqlarını öyrənmək və onların gələcəkdə keçiriləcək universitetlərarası müsabiqələrdə iştiraklarını təmin etməkdir.

Pərvin ABBASOV