Kondisionerlər və peyk antenaları söküləcək

Bu qurğular İçərişəhərin memarlıq görkəmini korlayır

İçərişəhərdəki bütün binaların fasadlarında quraşdırılmış kondisionerlər və peyk antenaları söküləcək. Buna səbəb həmin qurğuların qoruğun memarlıq üslubuna ciddi xələl gətirməsidir. Bununla bağlı “İçərişəhər” Dövlət Tarix-Memarlıq Qoruğu İdarəsinin qoyduğu möhlət mayın 31-də başa çatıb.

İdarədən Len.az-a bildiriblər ki, qoruq ərazisindəki binaların sakinlərinə və ofislərin rəhbərlərinə bu barədə xəbərdarlıq edilmişdi. Bununla bağlı küçələrdə və binaların üzərin elanlar da vurulub. Sakinlər müəyyən edilmiş vaxt ərzində bu qurğuları sökməyəcəkləri təqdirdə söküntü işlərini məcburi qaydada idarənin əməkdaşları tərəfindən aparılacağı qeyd olunub.

İdarədən bildirirlər ki, xəbərdarlıqdan sonra sakinlərin əksəriyyəti binaların fasadındakı kondisionerlərin və peyk antenalarının yerini dəyişib. Ancaq hələ xəbərdarlıqdan nəticə çıxarmayanlar da çoxdur. Bu səbəbdən həmin qurğuların sökülməsi ilə idarə özü məşğul olmaq məcburiyyətindədir. Binaların fasadlarında quraşdırılmış kondisionerlərin və peyk antenalarının sökülməsinə çəkilən xərclərin ödənməsi sakinlərin üzərinə düşəcək.

Elxan SALAHOV