Magistr imtahanı iyunun 21-də olacaq
05 iyun 2009 16:00 (UTC +04:00)

Magistr imtahanı iyunun 21-də olacaq

İyunun 21-də ali məktəblərin magistratura pilləsinə qəbul imtahanlarının ikinci mərhələsi keçiriləcək. Birinci mərhələni uğurla keçərək ikinci mərhələdə iştirak hüququ qazanmış bakalavrlar iyunun 8-dən etibarən elektron ərizələrinə daxil olaraq ixtisas seçimi apara bilərlər.

Lent.az-ın məlumatına görə, bu barədə Tələbə Qəbulu üzrə Dövlət Komissiyasının (TQDK) sədri Məleykə Abbaszadə imtahana hazırlıq prosesinə dair keçirdiyi mətbuat konfransında belə deyib. Komissiya sədri deyib ki, bakalavrlar 8-13 iyun tarixlərində “TQDK-nın ödəmə kartı”ndan (iş nömrəsi və şifrindən istifadə etməklə www.tqdk.gov.az saytında “Bakalavrın elektron ixtisas seçimi ərizəsi” formasına daxil olaraq qəbul proqramını və ixtisasların kodlarını seçərək təsdiq etməlidir. Onun sözlərinə görə, bu zaman bakalavrın seçdiyi magistr ixtisası onun bakalavr ixtisasına uyğun olmalıdır. Hər bir şəxs müxtəlif dövlət və qeyri-dövlət ali məktəblərinin ödənişli və ödənişsiz əsaslarla 10-dək ixtisas kodunu seçə bilər.

TQDK sədri bildirib ki, ikinci mərhələdə bakalavrın ixtisas üzrə bilikləri 50 test tapşırığı əsasında qiymətləndiriləcək. Sualların cavablandırılmasına 1 saat 30 dəqiqə vaxt ayrılır.

Məleykə Abbaszadə deyib ki, bu il magistratura pilləsinə ümumi qəbul planı 5168 yerdən ibarətdir. Bunun 3720-si Azərbaycan, 753-ü rus bölməsi, 695-i isə birgə müsabiqə aparılan ixtisaslar üçün nəzərdə tutulub.

Elxan SALAHOV
1 2 3 4 5 İDMAN XƏBƏRLƏRİ
# 1351

Oxşar yazılar