“Ölkə” qəzeti jurnalistlər arasında müsabiqə keçirir

“AXC: Milli Azadlıq Hərəkatı, müstəqilliyin bərpası və milli hökümət”

“Ölkə” qəzeti Azərbaycan Xalq Cəbhəsinin (AXC) yaranmasının 20-ci ildönümü ilə bağlı müsabiqə elan edib. Qəzetin redaksiyasından Lent.az-a daxil olan məlumata görə, jurnalistlər arasında elan olunan müsabiqə “AXC: Milli Azadlıq Hərəkatı, müstəqilliyin bərpası və milli hökümət” mövzusundadır.
Müsabiqəyə Azərbaycan Xalq Cəbhəsinin fəaliyyəti, onun keçdiyi tarixi-siyasi yol və xidmətləri ilə bağlı yazılar təqdim edilməlidir. Yazılar müsabiqə elan olunduqdan sonra dərc edilməlidir. Yazının sonunda onun elan olunan müsabiqə üçün hazırlandığı göstərilməlidir. Müsabiqə üçün nəzərdə tutulan materialların çap olunmuş variantının surəti və elektron variantı iyulun 10-na qədər “Ölkə” qəzetinin redaksiyasına (Mətbuat prospekti, 529-cu məhəllə, “Azərbaycan” nəşriyyatı, 4-cü mərtəbə) təqdim edilməlidir.
Müsabiqənin nəticələri iyulun 16-da açıqlanacaq.
Qaliblərə pul mükafatı və diplomlar təqdim ediləcək.