Məhkəmə işçiləri üçün təlim başlayır

Bu gün Bakıda hakimlər, dövlət ittihamçıları və vəkillərdən ibarət qrup beynəlxalq mütəxəssislərin iştirakı ilə məhkəmə dinləmələrinin simulyasiyasından ibarət təlim kursuna başlayıblar.

Lent.az-ın məlumatına görə, tədbirdə 5 hakim, 5 prokuror və Vəkillər Kollegiyasının üzvü olan 3 vəkil iştirak edib. Tədbirin açılışında iştirak edən Məhkəmə-Hüquq Şurasının aparat rəhbəri Cavid Hüseynov seminarın əhəmiyyətindən danışıb. O deyib ki, kurslar Məhkəmə-Hüquq Şurasının təlim zalında keçiriləcək: “Təlim zalı lazımi avadanlıqlarla təmin olunub”.

ATƏT-in Bakı Ofisinin rəhbəri səfir Bilge Cankorel isə deyib təmsil etdiyi qurum ötən illər ərzində Azərbaycanda hakimlərin və Baş Prokurorluğun əməkdaşlarının peşəkarlığının artırılmasına diqqət göstərib: “Ümidvaram ki, bu təlimdə iştirak çox faydalı olacaq. Bu tədbirdə iştirak edən hakimlər, dövlət ittihamçıları və vəkillər peşəkarlığın artırılmasına dəstək verəcək”.

Daha sonra bu ilin aprelində keçirilmiş “Təlimçilərin təlimi” kursunun iştirakçılarına sertifikatlar təqdim olunub.

Pərvin Abbasov