Boş yerlərə tələbə qəbulu başa çatır

Nəticələr avqustun 13-də elan olunacaq

Ali məktəblərin boş qalan yerlərinə tələbə qəbulu üçün müəyyən edilmiş vaxt bu gün başa çatır. Bir neçə saatdan sonra 1554 boş yerə qarşı neçə abituriyentin mübarizə aparacağı bəlli olacaq.

Tələbə Qəbulu üzrə Dövlət Komissiyasından (TQDK) Lent.az-a bildiriblər ki, bu gün saat 18.00-da ərizələrin qəbulu üçün internet səhifəsinə giriş bağlanacaq. Bu isə o deməkdir ki, ali məktəblərin boş qalan yerlərinə iddialı abituriyentlər həmin anadək ərizələrin təsdiqləməlidir.

TQDK-da deyirlər ki, ali məktəblərin boş qalan yerlərinə keçirilən müsabiqənin nəticələrinin avqustun 13-də açıqlanacaq. Xatırladaq ki, bu il ali məktəblərə tələbə qəbulu üçün ayrılmış 29030 plan yerinə 27476 abituriyent qəbul olunub. Qəbul planı 94,65 faiz yerinə yetirilib. Boş qalan plan yerlərinin ümumi sayı 1554-dür.

Elxan SALAHOV