996 abituriyent 600-dən çox bal toplayıb

Bu il ali məktəblərə qəbul olunanların yarıdan çoxu 300-500 bal arasında nəticə göstərib

“Bu il ali məktəblərə qəbul imtahanlarında 996 nəfər 600 baldan yuxarı nəticə göstərib. Amma bunun əvvəlki illərlə müqayisədə yaxşı, yoxsa pis nəticə olduğunu söyləmək çətindir. Bu göstərici əvvəlki illərin nəticələri ilə müqayisə olunmalıdır və nəyin yaxşı, nəyin pis olduğu təhlillərdən sonra müəyyənləşəcək”.

Lent.az-ın məlumatına görə, Tələbə Qəbulu üzrə Dövlət Komissiyasının (TQDK) sədri Məleykə Abbaszadə 2009/2010-cu tədris ili üçün ali və orta ixtisas məktəblərinə tələbə qəbulunun yekunlarına dair keçirdiyi mətbuat konfransında belə deyib. Onun sözlərinə görə, bu il ən yüksək bal Prezident Yanında Dövlət İdarəçilik Akademiyasında, Azərbaycan Tibb Universitetində, Bakı Dövlət Universitetində, Azərbaycan Dövlət Neft Akademiyasında, Azərbaycan Kənd Təsərrüfatı Akademiyasında və bir neçə özəl ali məktəblərdə qeydə alınıb.

Bütövlükdə isə ali məktəblərə qəbul olan abituriyentlərin 55,4 faizi 300-500 bal, 24,3 faizi 200-300 bal, 14,8 faizi 500-700 bal, 2,9 faizi 100-200 bal, 2,6 faizi isə 50-100 bal toplayıb.

Məleykə Abbaszadə bildirib ki, bu IV ixtisas qrupunda 400-dən yuxarı bal toplamış 44 abituriyentdən heç bir ali məktəblərə daxil ola bilməyib.

Elxan SALAHOV