Ekologiya naziri Kilimancaro dağına yürüşə başlayıb

Ekspedisiya hündürlüyü 5895 metr olan zirvəsinə qalxacaq

Ekologiya və təbii sərvətlər naziri, Azərbaycan Hava və Ekstremal İdman Növləri Federasiyasının Prezidenti Hüseyn Bağırovun başçılıq etdiyi birinci Azərbaycan Afrika ekspedisiyası Kilimancaronun Uhuru zirvəsinə istiqamət yürüşə başlayıb.

Nazirliyin mətbuat xidmətindən Lent.az-a bildiriblər ki, ekspedisiya Bakıdan avqustun 11-də çıxıb. “Azərbaycan, yeni zirvələrə doğru İlhamla irəli” şüarı altında həyata keçirilən yürüş Afrikanın ən hündür dağ massivi olan Kilimancaronun Uhuru yüksəkliyində başa çatacaq. Tanzaniyanın şimal-şərqində yerləşən bu zirvənin hündürlüyü 5895 metrdir. Bu yüksəklik Kilimancaro dağındakı Kibo vulkanının ən hündür nöqtəsidir ki, bu da dünyanın ən yüksək “Yeddi zirvə”sindən biridir.

Mətbuat xidmətindən bildirirlər ki, elmi, siyasi, idman və rəmzi əhəmiyyət daşıyan ekspedisiyanın tərkibində Ekologiya və Təbii Sərvətlər Nazirliyinin nümayəndələri də iştirak edirlər. Xatırladaq ki, bu, Azərbaycan Hava və Ekstremal İdman Növləri Federasiyasının təşkil etdiyi ikinci yürüşdür. Bundan əvvəl Hüseyn Bağırovun başçılıq etdiyi ekspedisiya qrupu ötən ilin 24 dekabr 2008-ci il tarixində Antarktidaya yürüş etmişdi.

Elxan SALAHOV