Bakı İslam Universitetinə qəbul imtahanı keçiriləcək

Ali təhsilli ilahiyyatçı olmaq istəyənlər “Quran”ı ərəb dilində oxumağı bacarmalıdır

Sentyabrın 5-də Bakı İslam Universitetinə daxili test üsulu ilə qəbul imtahanı keçiriləcək. Hazırda abituriyentlərdən sənəd qəbulu davam edir.

Universitetin islamşünaslıq fakültəsinin dekanı Hacı Fuad Nurullayev Lent.az-a bildirib ki, imtahanlar III ixtisas qrupuna aid edilən humanitar fənlər üzrə aparılacaq. Ancaq imtahan sualları abituriyentdə 4 deyil 2 variantda, A və B variantlarında təqdim olunacaq.

Bundan başqa Bakı İslam Universitetində ali təhsil olmaq istəyənlər qabiliyyət imtahanlarından da müvəffəqiyyət qazanmalıdır. Hacı Fuad Nurullayev bildirib ki, ali təhsilli ilahiyyatçı olmaq istəyənlərin ərəb dilində “Quran”ı üzündən oxuya bilməsi vacibdir. Bu səbəbdən də test imtahanlarından əvvəl abituriyentlərin bu qabiliyyətləri də yoxlanacaq.

Xatırladaq ki, Təhsil Nazirliyi 20 illik tarixi olan Bakı İslam Universitetinə lisenziyanı bu yaxınlarda verib. Sənədə əsasən, gələn ildən universitetə tələbə qəbulu da mərkəzləşdirilmiş qaydada Tələbə Qəbulu üzrə Dövlət Komissiyası tərəfindən aparılacaq. Bu ali təhsil müəssisəsində bakalavr pilləsində dinşünaslıq, magistratura pilləsində isə islamşünaslıq və din tarixi fakültələri fəaliyyət göstərəcək. Tələbələrə dini fənlərlə yanaşı dünyəvi elmlər də tədris olunacaq.

Elxan SALAHOV