Bələdiyyələrə dair sorğu keçirilir

İnsan Hüquqları və Maarifçilik İctimai Birliyi Prezidenti yanında QHT-lərə Dövlət Dəstəyi Şurasının dəstəyi ilə “Bələdiyyələrdə ictimai münasibətlərin inkişaf etdirilməsi, şəffaflığın artırılması üçün tədbirlər planının hazırlanması və reallaşdırılması” layihəsinin icrasını davam etdirir. Lent.az-ın məlumatına görə, 5 ay müddətində nəzərdə tutulan layihənin birinci mərhələsinə uyğun olaraq, bələdiyyə üzvləri və qulluqçuları arasında sorğular keçirilir.

Sorğu vərəqlərinə 12 sual daxil edilib. Burada bələdiyyələrin ümumi fəaliyyəti, ictimai münasibətlərin inkişafı, vətəndaş cəmiyyəti institutları ilə əlaqələri, bələdiyyələrin informasiya aşıqlığı, büdcənin ictimai müzakirəsinin aparılıb-aparılmaması və bələdiyyələrdə ictimai münasibətlərin inkişafına hansı yollarla nail olunması ilə bağlı suallar yer alıb.

Layihənin rəhbəri Rəfail Becanov bildirib ki, sorğulara başlanılmazdan əvvəl Ədliyyə Nazirliyi Bələdiyyələrlə İş Mərkəzinə də Quba, Şabran, Qusar və Xudat şəhər bələdiyyələrində layihənin birinci mərhələsində sorğular keçirilməsi ilə bağlı müraciət edilib.

Sorğular artıq Şabran və Xudat bələdiyyələrində başa çatıb. Layihə rəhbəri bildirib ki, növbəti mərhələdə sorğular Quba və Qusar bələdiyyələrində keçiriləcək.