65 yaş həddi ali məktəblərdə işləyənlərə şamil edilməyəcək

İyunun 10-da Milli Məclisin növbədənkənar sessiyasında “Əmək pensiyaları haqqında” qanununa və Əmək Məcəlləsinə dəyişikliklər edilməsi barədə məsələ müzakirə olunub.

Lent.az-ın məlumatına görə, Milli Məclisin Sosial Siyasət komitəsinin sədri Hadı Rəcəbli layihə barədə deputatlara məlumat verib. Dəyişikliklər deputatlar tərəfindən müzakirə edilərək, səsverməyə çıxarılıb. Səsvermə nəticəsində layihəyə dəyişikliklər təsdiq edilib.

Qeyd edək ki, Əmək Məcəlləsindəki dəyişikliklərə görə, 65 yaş həddinə çatmış şəxslərin təqaüdə çıxması məsələsi ali təhsil müəssisələrində çalışan şəxslərə şamil edilməyəcək. “Əmək pensiyaları haqqında” qanununa dəyişikliklərdə isə 25 il iş stajı olan elmlər doktorlarının pensiyasının baza hissəsinə 200 manat, elmlər namizədlərinin pensiyalarının baza hissəsinə isə 120 manat artırılması öz əksini tapıb.

Anar GƏRAYLI