“Nəzarət kitabçası” haqqında Əsasnaməyə dəyişdi

Nazirlər Kabineti “Nəzarət kitabçası” haqqında Əsasnaməyə dəyişiklik edib. Lent.az-ın Nazirlər Kabinetinin rəsmi saytına istinadən verdiyi məlumata görə, məqsəd “Sahibkarlıq sahəsində aparılan yoxlamaların vahid məlumat reyestrinin forması və aparılması qaydası haqqında Əsasnamə”nin təsdiq edilməsi barədə” Azərbaycan Respublikası Prezidentinin 2011-ci il 15 fevral tarixli fərmanının icrasını təmin etməkdir.

Dəyişiklikdə qeyd olunur ki, sahibkarlıq sahəsində aparılan hər bir yoxlama sahibkarlıq sahəsində aparılan yoxlamaların vahid məlumat reyestrində qeydiyyata alındıqdan sonra həyata keçirilə bilər. Yoxlamanın keçirilməsi üçün yoxlayıcı orqanın vəzifəli şəxsi yoxlamanın qeydiyyata alınması barədə sahibkarlıq sahəsində aparılan yoxlamaların vahid məlumat reyestrindən çıxarışı sahibkarlıq fəaliyyəti subyektinə təqdim etməlidir.

Eyni zamanda dəyişiklik Əsasnamənin müvafiq bəndlərində “nömrəsi” sözündən sonra “sahibkarlıq sahəsində aparılan yoxlamaların vahid məlumat reyestrində yoxlamanın kodu” sözlərinin əlavə edilməsini də nəzərdə tutur.