32 mərtəbəli binanın 34-cü mərtəbəsindən ev aldı

Çinin Şensi əyalətinin sakini 32 mərtəbəli binanın 34-cü mərtəbəsindən mənzil alıb.

Lent.az-ın xarici mediaya istinadən məlumatına görə, kişi 90 kvadratmetrlik mənzili bazar dəyərinin üçdə birindən aşağı qiymətə alıb.

Satıcı qiyməti mənzilin "məhdudlaşdırılmış mülkiyyət hüquqları" kimi təsnif edildiyini, bu terminin kollektiv kənd torpaqlarında qanunsuz tikilmiş və yenidən satıla bilməyən mənzillər üçün istifadə edildiyini bildirib.

Alıcı 17 min dollar ilkin ödəniş edib. Tikinti şirkəti tikintinin son tarixini gecikdirib, lakin iş sonda başa çatıb. Lakin ev sahibi açarları götürməyə gələndə ona binanın cəmi 32 mərtəbəli olduğu və 34-cü mərtəbədəki mənzilinin mövcud olmadığı bildirilib. Ona 32-ci mərtəbədə mənzil almaq üçün əlavə ödəniş təklif edilib, lakin onun vəsaiti olmayıb.

Alıcı pulun geri qaytarılmasını tələb edib. Tikinti şirkəti vəsaitinin olmadığını iddia edib və məbləğin yalnız yarısını qaytarıb, bundan sonra əlaqəni dayandırıb. Məhkəmə tikinti şirkətinə qalan məbləği may ayına qədər ödəməyi əmr edib, lakin iddiaçı pulu ala bilməyib.