Bakıda yerləşən 320 məktəbdə qida standartları yoxlanılır

“Təhsil sistemində və prosesində uşaqların təhsil, təlim, tərbiyəsi ilə yanaşı, onların fiziki sağlamlığı vacibdir. Çünki onlar millətin gələcəyidir”. Lent.az-ın məlumatına görə, bunu təhsil naziri Mikayıl Cabbarov jurnalistlərə açıqlamasında bildirib. Onun sözlərinə görə, bu baxımdan da ölkəmizdə “Təhsil müəssisələrində təhsil və tərbiyə alanların qidalanması üzrə dövlət standartı”nın tətbiqi ilə bağlı məsələyə diqqət etmək və nəzarəti həyata keçirmək üçün müəyyən işlər görülür. Nazir bildirib ki, ilkin mərhələ artıq başlayıb. Bakıda yerləşən 320-dən çox dövlət məktəbində qida standartlarının tətbiqi ilə bağlı tam unifikasiya işlərinin həyata keçirilməsi üçün özəl operatorların bu işə cəlb edilməsinə başlanılıb. Nazirin sözlərinə görə, gələn il yanvarın 1-dən bu prosesi tam həcmdə əhatə etmək mümkün olacaq: “Bakı məktəbləri ölkədə yerləşən məktəblərin cəmi 8 %-ni əhatə etməsinə baxmayaraq, orada oxuyan şagirdlərin sayı 27 %-dən çoxdur. Ona görə də bu layihənin birinci mərhələsində Bakı şəhərini əhatə etməklə proseslərin böyük hissəsini əhatə etmiş oluruq. Ölkənin digər ərazisində bu tədris ili ərzində standartların tam həcmdə tətbiq olunması üçün işləri başa çatdırmalıyıq”.