Martin Lindner Bakı Ali Neft məktəbində olub

Almaniya Bundestaqının üzvü, doktor Martin Lindner Bakı Ali Neft Məktəbinin professor-müəllim və tələbə heyəti qarşısında “Avropanın Enerji Siyasəti və bu siyasətdə Azərbaycanın rolu” mövzusunda məruzə ilə çıxış edib. Bu barədə Lent. az-a məktəbin mətbuat xidmətindən məlumat verilib.

Tədbirdə çıxış edən rektor Elmar Qasımov doktor Martin Lindnerə professor-müəllim və tələbə heyəti adından öz təşəkkürünü bildirib: “Ölkəmiz dinamik inkişaf edir və bu gün istər regionun, istərsə də Avropanın önəmli dövlətinə çevrilib. Bu amil dünyanın aparıcı dövlətlərinin Azərbaycana olan marağını artırıb”.

Tədbirdə çıxış edən qonaq “Avropanın Enerji Siyasəti və bu siyasətdə Azərbaycanın rolu”, ARDNŞ-nin də əsas iştirakçısı olduğu BTC, TANAP, TAP və Nabucco West kimi layihələrin əhəmiyyəti və ölkələrimiz arasındakı əməkdaşlıq haqqında ətraflı məlumat verib. Tədbirin sonunda qonaq Bakı Ali Neft Məktəbinin tələbələrinin çoxsaylı suallarını cavablandırıb.