Smartfonun şarj zamanı isinməsi həmişə nasazlıq əlaməti olmasa da, bəzi hallarda ciddi texniki problemdən xəbər verə bilər.
Lent.az-ın xarici mediaya istinadən xəbərinə görə, mütəxəssislər bildirirlər ki, normal qızma ilə təhlükəli həddə çatan temperaturu bir-birindən ayırmaq vacibdir.
Hansı hallarda qızma normal sayılır?
Mütəxəssislərin sözlərinə görə, sürətli enerji yığımı zamanı, ağır tətbiqlər işlədikdə, naviqasiyadan istifadə edərkən, video izləyərkən və ya isti havada şarj edilərkən smartfonun bir qədər isinməsi normal hesab olunur. Bundan əlavə, batareyanın tam dolmasına yaxın da cihazın temperaturu müəyyən qədər arta bilər.
Nə vaxt narahat olmaq lazımdır?
Telefonun korpusu əlinizdə saxlamaq mümkün olmayacaq qədər qızırsa, ekranda həddindən artıq qızma ilə bağlı xəbərdarlıq görünürsə və ya cihaz şarjı avtomatik dayandırırsa, bu artıq problemə işarə edə bilər. Mütəxəssislər bildirirlər ki, belə halların ən çox rast gəlinən səbəblərindən biri köhnəlmiş batareyadır. Əgər daha çox telefonun alt hissəsi qızırsa, problem şarj cihazı, kabel və ya enerji girişində ola bilər. Üst hissənin həddindən artıq isinməsi isə cihazın daxili komponentlərində nasazlıq ehtimalını artırır.
Smartfonun qızmasının qarşısını necə almaq olar?
Riski azaltmaq üçün mütəxəssislər aşağıdakı tövsiyələri verirlər:
yalnız orijinal və ya sertifikatlaşdırılmış şarj cihazlarından istifadə edin;
şarj zamanı telefondan istifadə etməyin;
cihazı yorğan, yastıq və digər yumşaq səthlərin üzərində saxlamayın;
istifadə edilməyən tətbiqləri bağlayın;
ehtiyac olmadıqda Wi-Fi, Bluetooth və digər simsiz bağlantıları söndürün;
telefonu sərin və yaxşı havalandırılan yerdə şarj edin.
Problem davam edərsə...
Əgər bütün bu qaydalara əməl etməyinizə baxmayaraq smartfon mütəmadi olaraq həddindən artıq qızırsa, bu, texniki nasazlığın əlaməti ola bilər. Belə halda cihazın servis mərkəzində mütəxəssislər tərəfindən yoxlanılması tövsiyə olunur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
