Xiaomi 17 Ultra bazardakı ən güclü kameralı smartfonlardan biri hesab olunsa da, çəkiliş keyfiyyəti üzrə reytinqdə lider ola bilməyib. Güclü texniki göstəricilərinə baxmayaraq, model DxOMark laboratoriyasının testlərində rəqiblərindən geri qalıb.
Xiaomi tərəfindən təqdim edilən Xiaomi 17 Ultra DxOMark reytinqində 166 bal toplayaraq ümumi siyahıda altıncı pillədə qərarlaşıb. O, 168 balla dördüncü sırada yer alan iPhone 17 Pro modelindən geri qalıb. Reytinqin lideri isə 175 balla Huawei Pura 70 Ultra olub.
Lent.az xəbər verir ki, Xiaomi 17 Ultra heç bir kateqoriya üzrə ən yüksək nəticəni əldə edə bilməyib.
Tənqidlər əsasən video çəkiliş və qrup portretləri ilə bağlı olub. Qrup şəkillərində bütün şəxslərin fokusda olmaması qeyd edilib. Səbəb kimi əsas 50 MP-lik, 1 düymlük sensorlu kameranın kiçik sahə dərinliyi göstərilir. Dəyişən diafraqma funksiyası bu problemi aradan qaldıra bilərdi, lakin istehsalçı bu funksiyadan imtina edib.
Bundan əlavə, avtomatik ekspozisiya və ağ balansın bəzi hallarda kadrdan kadra dəyişdiyi, avtofokusun isə həmişə hamar keçidlər təmin etmədiyi bildirilib. Nəticədə görüntü bəzən bir qədər “titrək” təsir bağışlaya bilər.
Bununla belə, əksər ssenarilərdə kamera yüksək səviyyə nümayiş etdirir. Şəkillər yaxşı detallanma və aşağı səs-küy səviyyəsi ilə seçilir, rənglər təbii görünür, portret rejimində isə bokeh effekti inandırıcı alınıb.
Xüsusilə 200 MP-lik periskop telefoto kamera yüksək qiymətləndirilib. 75–100 mm aralığında fasiləsiz zum imkanı və nisbətən iri sensor uzaq məsafələrdə keyfiyyətli çəkiliş təmin edir.
Xiaomi 17 Ultra-nın Avropada mart ayında satışa çıxarılacağı gözlənilir. Onunla birlikdə baza modeli olan Xiaomi 17 də təqdim olunacaq. Xiaomi 17 Pro və Xiaomi 17 Pro Max modelləri isə Çin bazarı üçün eksklüziv olaraq qalacaq.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
