İtaliyanın Poveqlia adası dünyanın ən qorxunc və sirli yerlərindən biri hesab olunur. Bu yer “Taun adası” kimi də tanınır və bir zamanlar yüz minlərlə insanın ölümünə şahidlik edib. İndi isə buraya ayaq basmaq qadağandır. Ada tamamilə tərk edilmiş və rəsmi olaraq qapalı zona elan olunub.
Ölüm və dəhşət adasının tarixi
Lent.az xarici mediaya istinadla xəbər verir ki, Poveqlia Venesiya yaxınlığında yerləşən üç kiçik adadan ibarət qrupdur. Əvvəllər bu yer dənizçilərin və kiçik icmaların sakit yaşayış məkanı idi, lakin 1793-cü ildə taunun yayılması ilə adanın taleyi kökündən dəyişdi.
Həmin il Poveqlia karantin zonası elan edildi. İtaliyanın müxtəlif yerlərindən taun xəstələri və yoluxmuş gəmilər buraya gətirilirdi. Xəstəxanalarda yer çatmadığından minlərlə insan açıq sahələrdə və toplu məzarlıqlarda dəfn edilirdi. Tarixi mənbələrə görə, burada 100 mindən çox insan həyatını itirib. Bu səbəbdən ada “ölülər adası” kimi tanındı.
Qorxulu əfsanələr və sirli hadisələr
Zaman keçdikcə ada yeni qaranlıq hekayələrlə əhatələndi. XX əsrin əvvəlində burada psixiatrik xəstəxana fəaliyyət göstərib. Əfsanəyə görə, bəzi həkimlər xəstələr üzərində qeyri-qanuni tibbi təcrübələr, o cümlədən lobotomiya əməliyyatları aparıblar. Deyilənə görə, həmin həkimlərdən biri sonradan ruhi pozğunluq keçirib və xəstəxananın qülləsindən özünü atıb.
Bu hadisələrin elmi sübutu yoxdur, lakin ada haqqında yayılan ruh hekayələri və mistik səslər illərdir qorxu sevərlərin marağını cəlb edir.
Bu gün Poveqlia necə görünür?
Son 50 ildə adada heç kim yaşamır. Köhnə xəstəxana, həbsxana və psixiatrik klinika binaları hələ də qalıb, lakin tədricən dağılır. Təbii sakitlik və dağılmış binaların yaratdığı mənzərə adanı sanki xəyal şəhərinə çevirib.
Adanı ziyarət etmək mümkündürmü?
Hazırda Poveqliyaya getmək qəti qadağandır. Oraya ictimai nəqliyyat işləmir və sahilə yaxınlaşmaq belə qanunla məhdudlaşdırılıb. Ziyarət üçün yalnız alimlərə və jurnalistlərə xüsusi icazə verilir. Digər turistlər isə adanı yalnız Venesiya körfəzindən keçən gəmilərdən uzaqdan seyr edə bilirlər.
İcazəsiz adaya girmək qanun pozuntusu sayılır və cərimə ilə nəticələnə bilər.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
