Alimləri şoka salan nadir ağac - İldırım təsir etmir - VİDEO

Alimlər nadir ağac növünü aşkar ediblər. Bu ağac ildırım vurandan sonra nəinki sağ qalır, həm də günəş işığı və qida maddələrinə çıxış uğrunda digər bitkiləri məhv etmək üçün öz dağıdıcı gücündən istifadə edir.

Lent.az xəbər verir ki, uzun illər elm adamları hesab edirdilər ki, ildırım ağaclara yalnız dağıdıcı təsir göstərir: ən yaxşı halda onlar zərbədən çətinliklə sağ çıxıblar, ən pis halda isə tamamilə məhv olublar. Bununla belə, yeni tədqiqat göstərib ki, bu stereotipi pozan xüsusi bir ağac növü - Dipteryx oleifera var.

“Cary” Ekosistem Tədqiqatları İnstitutunun meşə ekoloqu Evan Qora araşdırmada, "Bu tapıntılar bəzi ağacların ildırım vurmasından faydalandığına dair ilk dəlillər təqdim edir. Dipteryx oleifera ildırım vurmasından faydalanır" deyib.

Evan Qora bu ağacı 2015-ci ildə Panama cəngəlliyində işləyərkən kəşf edib. Dipteryx oleifera ağacı güclü ildırımdan demək olar ki, heç bir zərər görmədən sağ qalıb, digər bitkilər isə məhv olub.

Alim bu kəşfin böyük sürpriz olduğunu dilə gətirib. Ağacın gövdəsini əhatə edən mamırlar və ətrafdakı bütün bitkilər məhv olsa da, Dipteryx oleifera ağacı zədələnmədən qalıb.

Nəzəriyyələrini təsdiqləmək üçün tədqiqat qrupu ildırım monitorinq sistemindən istifadə edib. Tədqiqatın nəticələri hətta alimlərin özlərini də təəccübləndirib. Doqquz Dipteryx oleifera ağacının hamısı ildırım vurmasından minimal zərərlə sağ çıxıb, digər ağacların 64%-i iki il ərzində quruyub. Qalanları isə örtüyünün əhəmiyyətli hissəsini itirib.

Tədqiqatçılar bu ağac növünün ildırımları cəlb etmək üçün təkamül etdiyini irəli sürürlər. Onların hündür forması və geniş tacı onları təbii ildırım çubuqlarına çevirir.