Fantastik filmlər tamaşaçıları tamamilə fərqli dünyalara aparır, bəşəriyyətin gələcəyini və insan təxəyyülünün sərhədlərini göstərir. Kosmik səyahətlər, yadplanetlilər, süni insanlar və şüurun sirli qatları bu janrın ən maraqlı mövzuları arasındadır.
Lent.az xarici mediaya istinadən fantastika həvəskarlarının mütləq izləməli olduğu 4 filmi təqdim edir.
1. “Ulduzlararası” (2014-cü il)
Filmin hadisələri Yer kürəsinin artıq bəşəriyyəti qida ilə təmin etməkdə çətinlik çəkdiyi bir dövrdə baş verir. Quraqlıq əkin sahələrini məhv edir, qum fırtınaları adi hala çevrilir, ərzaq ehtiyatları isə getdikcə azalır.
Alimlər insanların yeni həyata başlaya biləcəyi başqa planet axtarmağa qərar verirlər. Keçmiş pilot Kuper də kosmik ekspedisiyaya qoşulur. O, digər tədqiqatçılarla birlikdə yaşayış üçün əlverişli planet tapmaq məqsədilə təhlükəli səyahətə çıxır.
Kuper kosmosda olduğu müddətdə övladları Yer kürəsində qalırlar. Ata ilə övladları arasındakı emosional bağ filmin ən təsirli məqamlarından birinə çevrilir.
2. “Başlanğıc” (2010-cu il)
Film tamaşaçıları insanların başqalarının yuxularına daxil ola bildiyi qeyri-adi dünyaya aparır. Dominik Kobb insanların şüuruna nüfuz edərək oradan qiymətli məlumatları əldə etməklə məşğuldur. Bu iş ona böyük qazanc gətirsə də, başqa ölkədə yaşayan övladlarının yanına qayıtmasına mane olur.
Bir gün Kobb qeyri-adi tapşırıq alır. Bu dəfə o, kiminsə şüurundan məlumat oğurlamalı deyil, əksinə, həmin insanın beyninə elə bir fikir yerləşdirməlidir ki, şəxs onu öz düşüncəsi hesab etsin.
Tapşırığı yerinə yetirmək üçün Kobb xüsusi komanda toplayır və bir neçə mərhələdən ibarət yuxu dünyası yaradır. Hər mərhələnin öz qaydaları var. Hadisələr inkişaf etdikcə yuxu ilə reallıq arasındakı sərhəd getdikcə daha da qarışır.
3. “Ülgüc üzərində qaçan 2049” (2017-ci il)
Filmdə insanlar zahiri görünüşünə görə adi insanlardan demək olar ki, fərqlənməyən süni varlıqlar – replikantlar yaradıblar.
Polis əməkdaşı Key müəyyən edilmiş qaydaları pozan replikantları tapmaq və zərərsizləşdirməklə məşğuldur.
Araşdırmalarından biri zamanı Key cəmiyyətin replikantlara münasibətini kökündən dəyişə biləcək məlumat əldə edir. Bu sirrin izinə düşən polis əməkdaşı illər əvvəl yoxa çıxmış keçmiş polis Rik Dekardla əlaqəli hadisələri araşdırmağa başlayır.
Key keçmişdə nələrin baş verdiyini və həmin hadisələrin replikantlar üçün niyə bu qədər əhəmiyyətli olduğunu anlamağa çalışır. Araşdırma dərinləşdikcə o, təkcə keçmişin sirlərini deyil, öz varlığının mənasını da sorğulamağa başlayır.
4. “Gəliş” (2016-cı il)
Film Yer kürəsinin müxtəlif bölgələrində nəhəng kosmik gəmilərin peyda olması ilə başlayır. İnsanlar yadplanetlilərin kim olduğunu və hansı məqsədlə gəldiklərini anlaya bilmirlər.
Cavabsız suallar dünyada gərginliyin artmasına səbəb olur. Yadplanetlilərlə əlaqə yaratmaq üçün dilçi alim Luiza Benks prosesə cəlb edilir. Onun əsas vəzifəsi yadplanetlilərin dilini öyrənmək və onların bəşəriyyətə nə demək istədiklərini müəyyənləşdirməkdir.
Luiza komandası ilə birlikdə ünsiyyət qurmağın yollarını axtarır. Lakin yadplanetlilərin dilini öyrəndikcə onun zaman və hadisələr haqqında təsəvvürləri dəyişməyə başlayır. Film tamaşaçıları ünsiyyətin gücü, zaman anlayışı və insanlığın gələcəyi haqqında düşünməyə vadar edir.
Bu dörd ekran əsəri fantastika janrının yalnız kosmik döyüşlərdən və qeyri-adi texnologiyalardan ibarət olmadığını göstərir. Hər biri insan təbiətinə, seçimlərə, yaddaşa və gələcəyə fərqli baxış təqdim edir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
