Nənələr və babalardan da aliment almaq olar?

Ailələrdə aliment mübahisələrinin artması uşaqların sosial təminatının gündəmdə qalmasına səbəb olur. Valideynlər öhdəliklərini yerinə yetirmədiyi hallarda isə uşağın rifahının necə qorunacağı məsələsi daha böyük suallar yaradır. Mütəxəssislər bildirirlər ki, belə vəziyyətlərdə alternativ təminat mexanizmlərinə ehtiyac yaranır. Mövcud qanunvericilik müxtəlif çıxış yolları təqdim etsə də, onların praktik tətbiqi bəzən suallar doğurur. Bəs uşağın təminatını qorumaq üçün nənə, baba və digər qohumlar da məsuliyyətə cəlb edilə bilərmi? Hüquqşünaslar bildirirlər ki, Azərbaycan qanunvericiliyində nənə və babanın aliment ödəməsi yalnız sosial zərurət yaranan hallarda mümkün olur. Bu isə o zaman tətbiq edilir ki, valideyn aliment ödəmək iqtidarında olmasın. Qanuna əsasən, əgər valideyn ölübsə, məhkəmə tərəfindən ölmüş elan olunubsa, itkin düşmüş hesab edilirsə və ya sağlamlıq imkanlarının məhdudluğu səbəbindən işləyə bilmirsə, uşağın təminatını qorumaq üçün aliment öhdəliyi nənə və babanın üzərinə keçə bilər.