Telefonla oynayıb qəza törədən sürücüyə görə "BakuBus"a xəbərdarlıq olundu - VİDEO-YENİLƏNİB

“BakuBus”a məxsus sərnişin avtobusu sürücüsünün mobil telefondan istifadə etdiyi üçün qəza törətməsinə görə şirkətə xəbərdarlıq olunub.

Bakı Nəqliyyat Agentliyinin mətbuat katibi Mais Ağayev Lent.az-a açıqlamasında bildirib ki, sərnişindaşımalarda təhlükəsizliyin təmin olunması ilə bağlı “BakuBus” MMC də daxil bütün daşıyıcılara mütəmadi olaraq tapşırıq və tövsiyələr verilir:

"Sərnişinlərin həyatı üçün ciddi təhdid yaradan hərəkətlərin yolverilməz olduğunu qeyd edərək bildiririk ki, bu məsələylə bağlı “BakuBus” MMC-yə xəbərdarlıq edilib. Analoji halların təkrarlanmaması üçün təcili surətdə zəruri tədbirlərin görülməsinə dair tapşırıqlar verilib.

Videodan da göründüyü kimi sükan arxasında mobil telefondan istifadə, sürücünün ani diqqətsizliyi məhz bu cür qəzalara, insan həyatına səbəb olar.

Ona görə də bir daha nəinki avtobus, ümumiyyətlə sükan arxasında olan bütün sürücülərə bildiririk ki, yol hərəkəti qaydalarına əməl etsinlər”.

***

Saat: 15:41

Bakıda bir neçə gün əvvəl baş verən avtobus qəzasının yeni görüntüləri yayılıb.

Lent.az xəbər verir ki, yayılan görüntülərdə “BakuBus” marşrut avtobusunun sürücüsünün mobil telefonla oynadığı əks olunub. Qəza da məhz bu zaman baş verir.

Qeyd edək ki, məlum yol-nəqliyyat hadisəsi iyunun 24-də “Azneft” dairəsi yaxınlığında baş verib.