Sevgi münasibətlərində hisslərin zəifləməsi hər zaman böyük mübahisələr və ya ayrılıq qərarı ilə özünü göstərmir. Bəzən münasibətin əvvəlki kimi olmadığını göstərən ilk əlamət tərəflərdən birinin davranışındakı kiçik dəyişikliklər olur. Psixoloji araşdırmalara görə, xüsusilə emosional ünsiyyətin azalması münasibətlərdə yaranan problemlərin mühüm göstəricilərindən biri ola bilər.
Lent.az sevgi münasibətlərində hislərin zəifləməsinə işarə edə bilən davranışları təqdim edir:
İlk dəyişən davranış hansıdır?
Münasibətlər üzrə tədqiqatları ilə tanınan psixoloq Con Qottmanın yanaşmasına əsasən, sağlam münasibətlərin əsas xüsusiyyətlərindən biri tərəflərin bir-birinin diqqət və yaxınlıq istəyinə müsbət cavab verməsidir.
Sevgi münasibətlərində emosional uzaqlaşma başladıqda isə bu diqqət azala bilər. Əvvəllər partnyorunun gününün necə keçdiyini soruşan, onun problemlərini dinləyən və kiçik uğurlarına sevinən insan zamanla həmin məsələlərə daha az maraq göstərə bilər.
Qottmanın araşdırmalarında partnyorun emosional yaxınlıq cəhdlərinə davamlı şəkildə laqeyd qalmasının münasibətlərdə narazılıq və uzaqlaşma ilə əlaqəli olduğu vurğulanır.
Söhbətlər qısalır, maraq azalır
Münasibətlərdə diqqət çəkən dəyişikliklərdən biri gündəlik söhbətlərin azalmasıdır. Əvvəllər saatlarla danışan cütlüklərin ünsiyyəti yalnız məişət məsələləri ilə məhdudlaşa bilər.
Tərəflərdən biri artıq hisslərini bölüşmür, qarşı tərəfin düşüncələri ilə maraqlanmır və birlikdə vaxt keçirməyə daha az təşəbbüs göstərir. Bununla belə, az danışmaq və ya mesajlara gec cavab vermək təkbaşına sevginin bitdiyini göstərmir. İş gərginliyi, yorğunluq və şəxsi problemlər də ünsiyyətə təsir edə bilər.
Mübahisələrə münasibət dəyişir
Bəzi hallarda hisslərin zəifləməsi mübahisələrin artması ilə deyil, problemləri həll etmək istəyinin azalması ilə müşahidə olunur. Tərəflərdən biri narahatlığını dilə gətirdikdə digəri mövzudan yayınır, söhbəti yarımçıq saxlayır və ya problemin həllində iştirak etmək istəmir.
Amerika Psixologiya Assosiasiyasının elmi nəşrlərində də münasibətlərdə bir tərəfin dəyişiklik tələb etməsi, digərinin isə davamlı şəkildə ünsiyyətdən yayınması ilə xarakterizə olunan davranış modeli araşdırılıb. Bu cür ünsiyyətin münasibətlərə təsiri isə cütlüyün şəraitindən asılı olaraq dəyişə bilər.
Fiziki və emosional yaxınlıq azalır
Sevgi münasibətlərində yaxınlıq yalnız fiziki təmasdan ibarət deyil. Bir-birinə qayğı göstərmək, çətin anlarda dəstək olmaq və xoş xəbərləri bölüşmək də emosional bağlılığın mühüm hissəsidir. Əgər tərəflərdən biri uzun müddət ərzində həm fiziki, həm də emosional yaxınlıqdan uzaqlaşırsa, bu, münasibətdə həll edilməmiş problemlərin mövcudluğuna işarə edə bilər. Lakin belə dəyişikliklərin səbəbi hər zaman sevgisizlik olmur.
Psixoloji gərginlik, depressiv əlamətlər və digər şəxsi çətinliklər də insanın münasibətdəki davranışlarına təsir göstərə bilər.
Münasibəti xilas etmək mümkündürmü?
Psixoloji yanaşmalara görə, emosional uzaqlaşma hər zaman münasibətin sona çatması demək deyil. Əsas məsələ dəyişikliklərin səbəbini müəyyənləşdirmək və tərəflərin münasibəti yaxşılaşdırmağa nə dərəcədə hazır olduğunu anlamaqdır. Açıq ünsiyyət qurmaq, qarşı tərəfi ittiham etmədən hissləri ifadə etmək, birlikdə keyfiyyətli vaxt keçirmək və problemlərin həlli üçün qarşılıqlı səy göstərmək münasibətlərin yaxşılaşmasına kömək edə bilər.
Unutmaq olmaz ki, sevginin zəiflədiyini müəyyən edən tək bir davranış yoxdur. Əsas diqqət edilməli məqam münasibətdə qarşılıqlı marağın, qayğının və emosional bağlılığın uzun müddət ərzində necə dəyişməsidir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
