Sultan Süleyman Qanuninin daxili orqanları axtarılır

Türkiyənin Mədəniyyət Nazirliyi hərəkətə keçib

1566-cı ildə Macarıstanda Zigetvar şəhərindəki qalanın fəthindən bir gün əvvəl 72 yaşında dünyasını dəyişən Sultan Süleyman Qanuninin daxili orqanlarının basdırıldığı məzarın və məzarın yanında tikilən türbənin tapılması üçün araşdırma aparılır.
Lent.az-ın Türkiyənin NTV telekanalına istinadən verdiyi məlumata görə, professor Arslan məzar və türbənin əvvəllər ehtimal olunduğu kimi Türbeqdə olmadığını söyləyib.
Onun sözlərinə görə, mühəndis, xəritəşünas və kapitan Leandro Angusissolanın (1653-1720) xəritəsində o dövrdə yeganə yüksək Zigetvar qalasının içərisindəki məsciddir. O, bu xəritə əsasında məzarı və türbəni tapacaqlarına inanır.
Araşdırma Türkiyənin Mədəniyyət Nazirliyinin nəzarəti altında aparılır.
Qeyd edək ki, Zigetvarın girişində 1994-cü ildə açılan Türk-Macar dostluq parkında Zigetvar qalasının macar komandanı Miklos Zrin və Sültan Süleyman Qanuninin böyük büstləri və rəmzi məzarları var.